Pumalag na pusher sugatan sa parak

KRITIKAL ang kalagayan ng isang hinihinalang tulak ng droga, makaraan barilin ng pulis nang bumunot ng baril ang suspek makaraan sitahin sa hindi pagsusuot ng helmet kahapon ng madaling-araw sa Valenzuela City.

Nakaratay sa Fatima Medical Center ang suspek na si Jamal Radja, 35, ng Bagbaguin, Brgy. 165, Caloocan City.

Batay sa ulat ng pulisya, dakong 2:30 a.m. nang maganap ang insidente sa Gen. Luis St., Brgy. Paso de Blas ng nasabing lungsod.

Nabatid mula kay Sr. Supt. Rhoderick Armamento, hepe ng Valenzuela Police, nagpapatupad ang kanyang mga tauhan ng Oplan Sita sa lugar, nang masita ang suspek habang sakay ng Honda XRM (3146-UM) dahil walang suot na helmet.

Nang iutos ng pulis na ilabas ang lisensiya ay kalibre .22 baril ang inilabas ng suspek. Bunsod nito, mabilis ding bumunot ng baril ang pulis at pinaputukan ang suspek.

Nakompiska mula sa suspek ang dalawang sachet ng shabu at kalibre .22 baril.

Rommel Sales