Ona, Tayag iniimbestigahan ng DoJ-NBI (Sa biniling bakuna)

INIIMBESTIGAHAN ng National Bureau of Investigation (NBI) sina Health Secretary Enrique Ona at Assistant Secretary Eric Tayag kaugnay kwestiyonableng pagbili ng pneumoccocal conjugate vaccine 10 o PCV 10 noong 2012.

Ikinasa ang pagsisiyasat noong Hunyo ng Anti-Fraud Division ng NBI.

Ipinaliwanag ni Justice Secretary Leila de Lima, batay sa reklamong kanilang natanggap, imbes PCV 10, isang uri ng bakuna para sa mga bata para sa mga pulmonary diseases gaya ng pneumonia, meningitis, sinusitis at bronchitis, ang PCV 13, ang dapat na binili ng DoH.

Ang PCV 13 ang inirekomenda ng World Health Organization at ng National Center For Pharmaceutical Access and Management at Formulatory Executive Council na dapat bilhin dahil ito ay mas mabisa.

Mas marami anila kasing sakit na masasaklaw ang PCV 13 kaysa PCV 10.

Ngunit ang nagyari noong 2012, kahit nakapaghanda na ang Bids and Awards Committee ng DoH para sa bibilhing PCV 13, ang PCV 10 pa rin ang iniutos na bilhin ng DoH.

Ang pagbili ng PCV 10 ay batay sa direktiba ni Assistant Secretary Eric Tayag ngunit nabatid na nakapag-isyu si Ona ng Certificate of Exemption para sa PCV 10.

Leonard Basilio