PUMANAW na ang dating kalihim ng Department of Justice (DoJ) at dating kongresista ng Iloilo City na si Raul Gonzalez, Sr.
Sa kanyang official Twitter account, kinompirma ng anak niyang si Dr. Marigold Gonzalez ang pagpanaw ng kanilang ama dakong 10:30 p.m. kamakalawa sa National Kidney Institute (NKI) sa Quezon City sa edad 83-anyos.
Una rito, nitong Biyernes pa lang lumabas na ang balita na pumanaw na ang dating kalihim ngunit agad itong nilinaw ng kanyang pamilya.
Sinabi ni Dr. Pacita Gonzalez noong Biyernes, hindi stable ang kondisyon ng mister sa NKI at hiniling ang dasal ng mga kababayang Ilonggo.
Matatandaan, taon 2007 nang sumailalim sa kidney transplant si Gonzalez at ang kanyang driver ang kanyang naging donor.
Si Gonzalez ay nagsilbing DoJ secretary at chief presidential legal counsel noong panahon ng administrasyon ni dating Pangulong Gloria Macapagal Arroyo at naging kinatawan din ng lone district ng lungsod ng Iloilo.