Kotse ng lasing na parak sumalpok sa truck

SUGATAN ang isang lasing na pulis makaraan sumalpok ang sinasakyang kotse sa isang nakaparadang truck sa Valenzuela City kahapon ng madaling-araw.

Ginagamot sa Valenzuela General Hospital ang biktimang si PO1 Rajah Soliman, nasa hustong gulang, nakatalaga sa Police Community Precinct (PCP) 6 ng Valenzuela City Police.

Habang kusang loob na sumuko ang driver ng binanggang truck (UTP 679) na si Joan Mariano, nasa hustong gulang, makaraan ang insidente.

Base sa ulat ng Traffic Enforcement Group (TEG) ng Valenzuela City Police, naganap ang insidente dakong 4:30 a.m. sa MacArthur Highway, Brgy. Karuhatan ng nasabing lungsod.

Kaugnay nito, sinimulan nitong Hunyo 15, 2014 ang pagpapatupad ng Republic Act 10586 o Anti-Drunk and Drugged Driving Act kasabay nang paggunita sa Road Safety Month sa nasabing buwan.

Ang mga lalabag ay papatawan ng parusang tatlong buwan hanggang 20 taon pagkabilanggo at pagmumultahin ng halagang P20,000 hanggang P500,000.

(ROMMEL SALES)