HATAW! D'yaryo ng Bayan hatawtabloid.com
BUNSOD nang matinding sama ng loob nang pagalitan ng ama dahil sa pag-ubos sa kanin, ini-hostage ng isang 21-anyos lalaki ang tatlo niyang nakababatang kapatid habang hawak ang isang granada sa loob ng kanilang bahay sa Caloocan City kamakalawa ng gabi.
Sa pakikipagnegosasyon ng mga awtoridad, napasuko ang suspek na si Gabriel Villafuerte, walang trabaho, residente ng Diamante St., Deparo North, Caloocan City.
Sa ulat ng pulisya, dakong 11 p.m. kamakalawa nang maganap ang hostage drama sa loob ng bahay ng pamilya.
Nauna rito, pinagalitan ng tatay niyang si Romeo Villafuerte ang suspek dahil inubos niya ang kanin kaya hindi nakakain ang kanyang mga kapatid.
Dahil nasaktan sa pananalita ng ama, naglabas ng granada ang suspek, ipinasok sa kwarto ang mga kapatid saka ikinandado ang silid.
Nagbanta ang suspek na may masamang mangyayari kapag hindi tumigil sa pagsesermon ang ama.
Agad nakahingi ng tulong sa mga awtoridad ang mga kapitbahay at napasuko ang suspek.
(ROMMEL SALES)
