HATAW! D'yaryo ng Bayan hatawtabloid.com
ni JOHN FONTANILLA
MASAYA ang Kapuso Star na si Hiro Magalona Peralta sa magandang turnout ng pagsasama nila sa Maynila episode kamakailan ni Barbie Forteza na marami ang nagsasabing may click factor ang tambalan.
Inulan nga si Hiro ng messages sa kanyang Twitter, FB, at Instagram na nagsasabing nagustuhan nila ang episode na magkasama sila ni Barbie at kinilig sila sa mga sweet moment ng dalawa.
Wish nga ni Hiro na someday ay magkasama sila ni Barbie hindi lang sa guesting sa mga palabas ng GMA 7 kung hindi sa mga future teleserye ng Kapuso Network.
Dagdag pa ni Hiro, masarap at magaan daw katrabaho si Barbie dahil bukod daw kasi sa magkaibigan sila ay matagal-tagal din silang nagkasama sa Tweenhearts.
Gusto raw ni Hiro ang pagiging magaling umarte ni Barbie at pagiging prangka at totoong tao nito na kung ano ang gustong sabihin at nararamdaman ay sinasabi na parehong-pareho niya kaya naman nagkakasundo sila sa maraming bagay.
