Coco, ‘di kayang tapatan at pataubin!

 ni  Jay Orencia

MILYA-MILYA ang agwat sa ratings ng teleseryeng Ikaw Lamang sa kalaban nitong programa sa kabilang estasyon. Simula sa pag-uumpisa nito hanggang ngayon, ito pa rin ang nangunguna.

Sino ba naman ang tatalo sa lakas ng karisma ng bidang aktor na si Coco Martin? Lahat ng teleseryeng kanyang pinagbidahan, tinutukan ng karamihan at palagi siya ang number one. Walang puwedeng tumalo sa kakayahan ni Coco bilang aktor. At walang sinuman ang puwedeng tumapat sa Dreamscape Entertainment Television na siyang gumagawa ng mga obrang istorya dahilan ng kanilang pangunguna.

Hindi kailanman kalilimutan ng mga namumuno sa Kapamilya ang pagbibigay ng proyekto kay Coco lalo’t alam nilang maraming tagahanga at sikat na sikat ito at nagpapasok  ng yaman sa kanilang kaban. Ang maganda pa, iba’t ibang klase ng istorya ang kanilang ginagawa para hindi pinagsasawaan ng manonood.

Kaya, kahit ano pang programa ang itapat kay Coco, hindi kailanaman sila magwawagi. Ang litanya nga ng kanyang mga tagahanga, Coco, IKAW LAMANG ang para sa amin. Ganoon!