Sisihan sa Mindanao blackout itigil na – Palasyo

TIGILAN na ang sisihan at magtulungan na lang sa paghahanap ng solusyon sa power shortage sa Mindanao.

Ito ang panawagan ng Palasyo kahapon sa Department of Energy (DoE) at National Power Corporation (Napocor) na nagtuturuan kung sino ang dapat managot sa naganap na Mindanao blackout kamakailan.

“Hindi po ito ang panahon para magsisihan. Ang kailangan po ay iyong pagtutulungan para hanapan ng solusyon. Sa amin pong pagkabatid ay ginagawa ng Department of Energy ang lahat ng nararapat para matugunan ang kasalukuyang power situation sa Mindanao,” sabi ni Communications Secretary Herminio Coloma, Jr.

Hindi pa batid hanggang  ngayon ang dahilan ng naranasang 32-oras na blackout sa Mindanao at magpapatuloy ang power shortage sa rehiyon hanggang 2016 dahil sa taon na ito pa lamang magagamit ang mga bagong power plant.

Nauna nang inamin ni Pangulong Benigno Aquino III na ang isa sa mga dahilan kung bakit nahuhuli ang Mindanao sa pagkakaroon ng power generation supply ay dahil sa exemption ng mga hydropower plant sa privatization.

“Kung susuriin po natin iyong estruktura ng power supply sa Mindanao, ang karamihan po halos kalahati po yata ng kanilang total supply ay nanggagaling sa hydro-electric power plant — iyon pong umaasa sa tubig. Karamihan po sa mga plantang ito ay matandang planta na. Kung hindi ako nagkakamali ay 30 years o older,” ayon kay Coloma. (ROSE NOVENARIO)