FEU, Adamson maghaharap ngayon sa volleyball

ANG huling puwesto sa stepladder semifinals ay nakataya ngayon sa playoff ng Far Eastern University at Adamson University sa women’s volleyball ng UAAP Season 76 sa The Arena sa San Juan.

Maghaharap ang Lady Tamaraws at Lady Falcons sa alas-4 ng hapon pagkatapos na magtabla ang dalawang pamantasan sa parehong kartang anim na panalo at walong talo sa pagtatapos ng eliminations.

Parehong natalo ang FEU at Adamson kontra Ateneo at University of Santo Tomas noong Sabado at Linggo, ayon sa pagkakasunod.

Ang mananalo ngayon ay haharap sa Lady Eagles sa isa pang knockout game sa Sabado kung saan ang mananalo rito ay makakalaban ng  National University sa huling stepladder.

Hawak ng Lady Bulldogs ang twice-to-beat na bentahe.

Nakapasok kaagad sa finals ang De La Salle University pagkatapos na walisin ng Lady Spikers ang lahat ng 14 nilang laro sa eliminations at kailangan nila ng dalawang panalo upang mapanatili ang kanilang titulo.

(James Ty III)