Sapatero minartilyo sa agawan ng higaan

ARESTADO ang dalawang construction worker matapos pagpapaluin at pagsasaksakin ang isang lalaki sa Sta. Cruz, Maynila.

Kinilala ang biktimang si Mateo Buyron, 53, sapatero, walang permanenteng tirahan.

Sa ulat ni SPO1 Charles John Duran, isang Raymond Malabago, 19, binata, ng 1795  Malabon St., barangay tanod na naka-duty sa lugar, ang nag-report kay Brgy. 338, Zone 34 Chairman Elvira Garcia, dakong 5:00 ng umaga hinggil sa bangkay na natagpuan sa panulukan ng A. Mendoza at Malabon St., Sta. Cruz.

Batay sa CCTV footage ng barangay, dakong 2:23 ng madaling araw, nakitang natutulog ang biktima sa kalsada nang paghahampasin ng martilyo at pagsasaksakin ng mga suspek na sina Jeffery Robles, 25 construction worker, ng Tondo, at Roel Cabarles, 22, ex-convict, nakatira sa Permanent Housing, Balut, Tondo, na nakilala nang ituro ng pamangkin ng biktimang si Arnel Padilla, 17.

Ayon sa kapatid ng biktimang si Corazon Fernandez, 50, ng 1785 Malabon St., matagal nang may alitan sa higaan ang suspek na si Robles at ang biktima.

Dinala ang bangkay ni Buyron sa police morgue para sa awtopsiya.

Idinulog ang kaso ng mga suspek sa Manila Prosecutors Office para sa inquest.

(JASON BUAN)