Saturday , October 24 2020
Breaking News
You are here: Home / Sports / Nagbabaga sa tamang panahon!

Nagbabaga sa tamang panahon!

Iyan ang Rain or Shine Elasto Painters na siyang pinakamainit na koponan sa kasalukuyang PLDT myDSL PBAPhilippine Cup.

Nakapagposte ng limang sunud-sunod na panalo ang koponan ni coach Joseller “Yeng” Guiao uang umakyat sa ikalawang puwesto kasama ng Petron Blaze na mayroong 9-3 karta sa likod ng nangungunang Barangay Ginebra San Miguel.

Nagsimula ang winning streak ng Elasto Painters nang patirin nila ang winning streak naman ng Petron Blaze, 99-95 noong Disyembre 21.

Matapos iyon ay isinunod nila ang  Barako Bull (99-95), SanMig Coffee (101-77), Globalport (98-87) at defending champion Talk N Text (90-88).

Karamihan sa mga panalong ito ay naitala nila matapos ang dikdikang endgame. Kaya naman natutuwa si Guiao sa ikinikilos ng kanyang mga bata.

Mas masarap kasi yung nananalo ka sa dikdikang paraan kaysa sa tambakan. Sa ganitong sitwasyon ay lumalabas ang character ng koponan.

“We’re winning in close games because of our mental toughness,” ani Guiao.

Ibig sabihin ay naihahanda na niya ang Elasto Painters para sa pitpitang dulong elimination round. Kung magtuluy-tuloy ang gilas ng Elasto Painters, puwede nilang makamit ang isa sa dalawang slots na magbibigay sa kanila ng twice-to-beat na bentahe sa quarterfinal round.

Bagama’t walang garantiya iyon na makakadiretso sila sa semifinals, aba’y malaking bentahe na rin iyon. Isang panalo na lang ang kakailangan nila upang umusad.

At siyempre, atat ang Elasto Painters na makabalik sa Finals ng Philippine Cup.

Finalist kasi sila noong nakaraang season kung  saan nakalaban nila sa best-of-seven series ang Talk N Text. Kaso mo’y winalis sila ng Tropang Texters, 4-0. At masakit talaga iyon.

Kaya naman gustung-gusto nilang makabawi.

Well, nasa tamang direksyon na sila. Nag-iinit na sila. Kailangan na lang na patuloy silang magbaga at huwag ginawin sa dulo.

Sabrina Pascua

About hataw tabloid

Leave a Reply

Your email address will not be published. Required fields are marked *

*

Scroll To Top