HATAW! D'yaryo ng Bayan hatawtabloid.com
CAMP OLIVAS, Pampanga – Patay ang isang Pakistani national makaraang barilin ng nakaalitang kapitbahay dahil sa maingay na alagang aso sa City of San Jose del Monte, Bulacan kamakalawa ng hapon .
Kinilala ang biktimang si Chaudry Hussain y Sabir, negosyanteng Pakistani, nalagutan ng hininga habang nilalapatan ng lunas sa ospital, pero agad nasakote ang tumakas na suspek na si Almansor Sanday y Datu Kaka, 40, jobless, tubong Talayan, Maguindanao, magkapitbahay sa Towerville Apartment sa Brgy. Gaya-Gaya.
Ayon sa imbestigasyon ng pulisya, dakong 1 p.m. habang nagpapakain ng alagang aso ang biktima biglang dumating suspek. Galit na kinompronta ng suspek ang biktima hinggil sa pag-iingay ng aso na humantong sa kanilang mainitang pagtatalo.
Pagkaraan ay bumunot ng baril ang suspek at dalawang beses na pinaputukan sa leeg ang biktima saka mabilis na tumakas.
Sa follow-up operation ay agad nadakip ang suspek.
ni RAUL SUSCANO
