Dumukot sa 3-buwan sanggol ginang kinasuhan

KASONG kidnapping ang kinakaharap ng isang ginang na itinuturong dumukot sa 3-buwan gulang na sanggol na babae sa Marikina City.

Kinilala ni P/Supt. Manuel Cruz, deputy chief of police ang suspek na si Janeth Celmar y Ruba, alyas “Lotlot,” nasa hustong gulang, ng #31 Daisy St., Brgy. Malanday.

Ayon sa inang si Razil Baloro, 28, dinukot ng suspek ang kanyang anak na si Baby Sophia, nitong Nobyembre 30, dakong 4:00 ng madaling araw.

Ani SP01 Gemma Mirabueno, nagulat ang ina nang paggising ay wala na si Baby Sophia.

Bago nawala ang bata, sinabihan si Baloro ng suspek na makikitulog siya at gusto’y makatabi ang anak ng biktima.

Hindi pumayag si Baloro at pinauwi ang suspek. Bago nangyari ang pagdukot, nakita pa niyang paikot-ikot ang suspek at mga kasama sa labas ng kanilang bahay dakong 1:00 ng madaling araw.

Agad sinampahan ng kasong kidnapping sa Marikina Regional Trial Court ang suspek, habang isinasagawa ang hot pursuit sa ikadarakip ng  suspek.              (ED MORENO)