Gerald, mas palaban na ngayon!

NAKAPANGHIHINAYANG at magtatapos na ngayong gabi ang Bukas Na Lang Kita Mamahalin na pinagbibidahan nina Gerald Anderson, Dawn Zulueta, Cristine Reyes, Rayver Cruz at marami pang iba.

Gandang-ganda kasi ako sa takbo ng istorya nito dahil siguro ito’y ukol sa pagmamahal ng isang ana sa kanyang anak.

Samantala, inamin ni Gerald na naging mas palaban na siya sa buhay dahil sa karanasang pinagsaluhan nila ng kanyang karakter sa top-rating primetime teleserye ng ABS-CBN.

“Dahil sa mga pinagdaanan ni Miguel, mas na-realize kong kahit napakahirap ng sitwasyon at kahit marami kang kalaban, huwag na huwag kang susuko,” ani Gerald kaugnay ng karakter niyang nakulong sa kasalanang hindi niya ginawa.

Nalantad na ang katotohanang si Marcus (Rayver) ang tunay na nanggahasa kay Carla (Diana Zubiri), makamit na kaya nina Miguel at Zenaida (Dawn) ang inaasam na hustisya para sa kanilang pamilya? Anong ‘pasabog’ ang gugulat sa mga pamilya nina Zenaida at Victoria (Dina Bonnevie) na babago sa takbo ng buhay nila?

Huwag palampasin ang pagtatapos na hindi dapat pakawalan ng Bukas Na Lang Kita Mamahalin, pagkatapos ng Maria Mercedes sa ABS-CBN Primetime Bida.

Maricris Valdez Nicasio