Wednesday , September 30 2020
Breaking News
You are here: Home / Breaking News / NFA Nagbida sa Zambo relief ops (Budget sa anniversary ibinigay sa evacuees)

NFA Nagbida sa Zambo relief ops (Budget sa anniversary ibinigay sa evacuees)

092713_FRONT

TINIYAK ng National Food Authority (NFA) na sapat ang supply ng pagkain sa Zamboanga city sa kabila ng nagaganap na kaguluhan doon, sa pamamagitan ng aktibong pamamahagi ng bigas sa mga kinauukulang ahensiya at tanggapan ng pamahalaan sa nasabing lungsod.

Dahil sa ginagawa ng NFA ay hindi gaanong nararamdaman ng umaabot sa mahigit 105,000 evacuees ang gutom at sa kabila ng dami nila ay natitiyak ng mga awtoridad na nangangalaga sa kanila na nakakakain sila ng tatlong beses sa maghapon.

Umaabot na sa mahigit 8,500 sako ng bigas ang naipamahagi ng ahensiya simula nang sumiklab ang gulo sa pagitan ng military at mga kasapi ng rebeldeng Moro National Liberation Front (MNLF).

Kabilang sa tumanggap ng mga naipamahaging bigas ng NFA ang Regional Office 9 ng Department of Social Welfare and Development (DSWD), ang local government ng Zamboanga city at marami pang ibang ahensiya at tanggapan ng pamahalaan na namamahagi sa naaapektohang mga residente ng lungsod.

Maliban doon ay nagpakalat din ng rolling stores ang NFA sa iba’t ibang lugar para tiyakin na tuloy-tuloy ang supply ng bigas sa lungsod, na mabibili ang bigas sa P27 kada kilo para sa regular milled rice at P32 kada kilo para naman sa well milled rice.

Kaugnay nito, ipinagdiwang ng NFA ang ika-41 anibersaryo sa  makabuluhang paraan sa pamamagitan ng pagbibigay ng budget nila para sa nasabing okasyon sa mga apektadong residente ng Zamboanga city.

“Sa harap ng mga suliraning kinakaharap ng bansa , minabuti namin na gawing makabuluhan ang pagdiriwang sa pamamagitan ng pagkakaloob ng aming budget para sa okasyon sa ating mga kababayan sa Zamboanga city,” wika ni NFA Administrator Orlan Calayag.

Maliban sa anniversary budget ay ipinasiya rin ng mahigit 800 empleyado ng ahensiya na ibigay ang bahagi ng kanilang meal allowance na aabot sa P300 kada isa.

Nagtayo rin ang NFA Region 9 ng relief operations center na nangangalap ang mga kawani ng ahensiya ng mga donasyon para ibigay sa mga biktima ng labanan.

Dahil sa ginagawa ng NFA ay nakatanggap ang pamunuan nito ng mga papuri at pasasalamat mula sa iba’t ibang grupong pribado at publiko.

Pinuri rin ni Calayag ang mga tauhan niya sa NFA Region 9 dahil sa ginagawang maayos na trabaho para tiyaking walang patid ang supply ng bigas sa lungsod.

“Sa mga ganitong panahon at sitwasyon nakikita ang dedikasyon at maayos na trabaho ng ating mga empleyado , isa itong patunay na nagagawa natin ang isa sa ating mandato na  tiyakin ang food security at katatagan ng supply ng bigas,” paliwanag ni Calayag.

Ang NFA Zamboanga ay kasalukuyang may stock na bigas na aabot sa 41 araw base na rin sa pang-araw-araw na kunsumo ng mga mamamayan na umaabot sa 6,150 sako kada araw.

HATAW News Team

About hataw tabloid

Leave a Reply

Your email address will not be published. Required fields are marked *

*

Scroll To Top