HATAW! D'yaryo ng Bayan hatawtabloid.com
TIKOM ang bibig ng Palasyo sa isyu ng pagdakip kahapon ng mga pulis kay Anakapwis Rep. Fernando Hicap sa Hacienda Luisita sa Tarlac nang dumalo sa isang fact-finding mission hinggil sa pamamahagi ng lupa ng Department of Agrarian Reform (DAR) sa naturang lugar.
”I cannot comment as we are not familiar with the details of the incident,” tugon ni Presidential Spokesman Edwin Lacierda nang hingin ang kanyang reaksyon sa insidente.
Batay sa kalatas ng Anakpawis party-list, dakong 11:45 a.m. kahapon pagkagaling sa isang dialogue sa Philippine Army sa Brgy. Balete, inaresto ng mga kagawad ng Tarlac Police sina Hicap, Danilo Ramos ng Anakpawis party-list, Florida “Pong” Sibayan, acting chairperson ng AMBALA, Sister Patricia Fox, Ericson Acosta, Kerima Acosta, Rene Blazan, Kala San Juan, Ronald Matthew Gustillo, Luz Versola, at iba pa.
Ipiniit sila sa Tarlac City Police Station dahil sa mga kasong malicious mischief, illegal assembly, direct assault at trespassing.
Nagpunta sa Hacienda Luisita ang pangkat ni Hicap upang imbestigahan ang mga ulat ng panloloko, pandarahas at land grabbing na iniulat ng mga benepisaryong magbubukid na sinasabing naganap sa pamamahagi ng Department of Agrarian Reform (DAR) ng Lot Allocation Certificates (LAC) sa 10 barangay ng asyenda mula Hulyo 18 hanggang Agosto 21.
(ROSE NOVENARIO)
