Si Mar, si Grace, si Duterte o si Chiz?
hataw tabloid
July 12, 2015
Opinion
SUMASAKIT raw ang ulo ni PNoy kung sino ang iendorso sa pagkapresidente sa 2016.
Si DILG Sec. Mar Roxas raw ba o si Senador Grace Poe at alin kina Mayor Rodrigo Duterte at Sen. Chiz Escudero ang para Bise Pre-sidente.
Sina Poe at Escudero ay hindi miyembro ng Liberal Party ni PNoy pero kasama sila sa Team PNoy noong 2010.
Pero ang talagang gusto raw mangyari ni PNoy ay Roxas-Poe tandem.
Sa Hulyo 27, sa huling SONA ni PNoy, inaasahan kung sino ang kanyang iendorso.
Pero, kung majority ng opisyal ng Liberal Party (LP) ang tatanungin, ang gusto nilang ma-ging standard bearer ay si Roxas dahil wala raw maipipintas sa karanasan o track records sa politika, malinis, pati na sa family at educational backgrounds.
At si Roxas ay nagpakumbaba na kay PNoy noong 2010. Siya ang matunog noon tatakbong presidente pero napakiusapang mag-VP na lang ni Noynoy dahil sa napakalakas na simpatiya ng mamamayan nang pumanaw si dating Pangulo Cory Aquino, ang nanay ni PNoy at misis ng minarder na si dating Senador Ninoy Aquino.
Kinausap na ni PNoy sina Poe at Escudero. Sinabihan raw silang dapat isa lang ang tatakbo sa kanila at dapat ay manatili silang buo para maging tuloy-tuloy ang tuwid na daan at mapabilis ang pag-unlad ng Pilipinas.
Malakas ang kutob ko, Roxas-Poe ang iendorso ni PNoy para sa 2016. At sa 2022 ay Poe-Escudero na tulad ng sinabi ni Budget Sectetary Butch Abad na 20 years ang programa ng Liberal Party para sa tuloy-tuloy na pag-unlad ng bansa. Sana nga…
Parang legal na ang “VK” at “fruit game” sa Intramuros, Manila
– Report ko po… parang legal na kasi ang VK (video karera) at fruit game dito sa amin sa Intramuros, Manila. Kahit sa ibang barangay o lugar hinahayaan nalang ng mga pulis. Kasi may lagay yata sa kanila iyon. Sana maaksiyunan ng DILG ito kasi perwisyo po sa mga kabataan e. – 09234866…
Unang dapat sisihin sa paglaganap ng makina ng VK o fruit games sa isang barangay ang inyong tserman. Kung ayaw ng tserman n’yo nang ganyang sugal, hindi makapupuwesto sa barangay n’yo ang mga pesteng makinang ‘yan. May lagay ‘yan sa Tserman n’yo!
Bakit gusto ni VP Binay ng Cha-cha?
– Bakit gusto ni VP Binay ang Cha-cha? Para alisin ang 6-year presidential term limit? Gusto ba niya na siya ay president-for life? Bakit ayaw rin niya ang Anti-Dynasty Bill? Dahil kaya ang nais niya ay lahat ng kaanib ng kanyang pamilya ay doon sa gobyerno tulad ngayon? -09279426…
May tama ang ating texter…
Eatery sa kalye ng Panday Pira at Velasquez, Tondo
– Mr. Venancio, reklamo ko lang po yun kainan dito sa kanto ng Velasquez at Panday Pira. Halos sakop na po yun kalsada. Wala na po madaanan lalo na po pag emergency. Sinakop na po ng mga lamesa nya yun kalsada. Dati po kagawad yun may-ari nito. Sakop po ito ni Chairman Alvin Matilla ng Brgy. 81. Masyado na po kasi sakop ng eatery ang kalsada. Paano na po pag gabi. – Concerned citizen
Mabait at masipag ang tserman ng Brgy. 81. Surely mapapakiusapan niya ang may-ari ng eatery. At sana’y sumunod sa tama kung sino man ang may-ari.
Andaming drug pushers sa Rizal
– Report ko po ang napakarami nang drug pushers dito sa aming bayan ng Rizal lalo na dito sa Binangonan. Bakit hindi sila hinuhuli? Balita po kasing mga pulis din ang nagpapabenta ng droga rito. Dapat po PDEA ang manghuli rito. – Concerned citizen
REAKSYON at REKLAMO… Sumulat sa POLICE Files!: JGV Publishing House, Inc., Leyland Bldg., Delgado St., cor 20th St., Port Area Manila Phil. Telefax 521-7015
HATAW! D'yaryo ng Bayan hatawtabloid.com
