HATAW! D'yaryo ng Bayan hatawtabloid.com
TULUYANG pagbulsa sa quarterfinals berth ang target ng Hog’s Breath Cafe sa sagupaan nila ng Blackwater Sports sa PBA D-League Aspirants Cup mamayang 2 pm sa Trinity University of Asia Gym sa Quezon City.
Sa unang laro sa ganap na 12 ng tanghali ay magtutunggali ang Cagayan Valley at Cebuana Lhuillier.
Pinatid ng Hog’s Breath Cafe ang three-game losing skid nito nang talunin ng Razorbacks ang National University/Banco de oro, 87-80 para sa 8-3 record.
Sa kabilang dako, ang Blackwater Sports ay ginantihan ng defending champion NLEX Road Warriors, 103-86 noong Huwebes at nalaglag sa ikapitong puwesto sa record na 6-4.
Kung makakabangon sila sa kabiguang iyon ay makakatabla sila ng Cafe France sa ikaanim na puwesto at mananatiling buhay ang kanilang tsansang pumasok sa quarterfinals. Didikit din sila sa Hog’s Breath Cafe at ubra pang puntiryahin nila ang ikaapat na puwesto sa pagtatapos ng 13-game elims.
Ang Hod’s Breath Cafe na hawak ni coach Caloy Garcia ay pinamumunuan ng mga Letran Knights na sina Kevin Racal, Jonathan Belorio, at Ford Ruaya kasama nina Philip Paniamogan at Paul Sanga.
(SABRINA PASCUA)
