Emperador, bumili pa ng taniman ng ubas sa Espanya

Madrid, Espanya.  Sinusuri nina Andrew Tan (kanan), chairman ng Emperador Inc., at Jorge Bohórquez Domecq, tagapamahalang director ng Emperador International Ltd., ang kanilang pinakabagong taniman ng dekalidad na ubas. Bumibili pa ng taniman ng ubas sa Espanya ang Emperador para masuportahan ang itinatayang pagdoble ng volume ng Emperador Deluxe Spanish Edition sa Filipinas.

MULING bumili ng 409 ektaryang taniman ng ubas sa probinsya ng Madrid, Espanya ang Emperador International Ltd., sa pamamagitan ng Grupo Emperador Spain S.A. nitong Oktubre 24.

Ani Jorge Bohórquez Domecq, ang tagapamahalang direktor ng Emperador International, na isinalin mula sa Espanyol: “Kami ay bumibili pa ng ibang taniman ng ubas para masuportahan ang paggawa ng brandy sa Espanya. Kami ay natutuwa sa malugod na pagtanggap ng mga Filipino sa Emperador Deluxe Spanish Edition, na gawa rito sa Espanya.

“Nalagpasan ng kabuuang benta ng Emperador Deluxe ang inaasahan namin. Dahil dito, tinataya naming madodoble ang volume ng Emperador Deluxe sa susunod na taon,” dagdag ni Domecq.

Sa kanyang pagtatapos, sinabi ni Domecq na naghahanda na ang Emperador para makapasok sa Vietnam sa susunod na taon.