CAMP OLIVAS, Pampanga – Arestado ang 29 katao bunsod ng pagpapalaro ng illegal bookies sa pagsalakay ng mga awtoridad kamakalawa ng tanghali sa Baliwag, Bulacan.
Base sa report ng tanggapan ni Central Luzon Police Director, Chief Supt. Raul Petra Santa, dakong 1 p.m. nang salakayin ng mga awtoridad ang compound sa #624 Lajom St., Brgy. Sto. Cristo at nahuli ang mga suspek habang nagbobola ng illegal bookies.
Nakompiska mula sa mga suspek ang stamp pad, rubber stamp, ball pens, calculators, at nakolektang pera. Kompiskado rin ang bulto ng mga papelitos ng bingo milyonaryo/STL.
Bunsod ng insidente, nasibak sa pwesto ang hepe ng Baliwag Police Station na si Supt. Julius Domingo alinsunod sa “one-strike policy” ng pulisya laban sa illegal na sugal.