5 patay sa buy-bust ops sa Cavite

PATAY ang lima katao sa magkakahiwalay na drug buy-bust operation na ikinasa ng Philippine National Police (PNP) sa Cavite kamakalawa ng gabi at kahapon ng madaling araw.

Unang napatay ng PNP ang suspek na kinilala lamang sa alyas Orly sa Bacoor, Civite.

Sa Rosario, Cavite, itinumba rin ng mga pulis si Jerry Abundo nang manlaban sa arresting PNP officers.

Ang tatlong lalaki sa Trias, Cavite ay napaslang nang manlaban sa mga pulis na magsisilbi sana ng arrest warrant sa suspek na si Evan Sevilla, nahaharap sa kasong paglabag sa R.A. 9165 o Comprehensive Dangerous Drugs Act of 2002.

Naaktohan ng mga pulis ang mga suspek na gumagamit ng ilegal na droga sa bahay ni Sevilla.

Agad nagpaputok ang mga suspek nang matunugan ang mga pulis.

Napuruhan ng mga pulis ang target ng operasyon na si Sevilla at dalawang kasamahan.