IPINAKIKITA nina Port of NAIA District Collector Carmelita Talusan at Customs Commissioner Isidro Lapeña ang tinatayang P15.496 milyon halaga ng illegal substance na nasabat ng Bureau of Customs (BOC) sa bodega ng Central Mail Exchange Center (CMEC) at Federal Express (FedEx) kahapon. (JSY)

P15.5-M ilegal na droga at damo nasabat sa NAIA

JSY October 5, 2018 News

UMABOT sa P15.496 milyon halaga ng illegal substance ang nasabat ng Bureau of Customs (BOC) sa bodega ng Central Mail Exchange Center (CMEC) at Federal Express (FedEx) kahapon.

Ayon kay Port of NAIA District Collector Carmelita Talusan at Customs Commissioner Isidro Lapeña, ang limang shipment ng methamphetamine hydrochloride o shabu, party drugs at marijuana ay dumating sa bansa sa magkaahiwalay na petsa ng Abril, Mayo at Hunyo mula sa Thailand, USA, Rwanda, at Pakistan.

Ito ay nakatago sa foot and calf massager, religious frame, letter, boxing gloves, baseball jersey at mga damit.

Ayon kay Talusan, naka-consign ang mga illegal shipment kina Melinda Dacallos ng Calooocan City; Joseph Manialac ng Angeles City; Logy Ramirez ng Batac, Ilocos Norte; Edward dela Rosa ng Las Piñas City; at Rico Delicano ng Cotabato City.

Napag-alaman na pawang fictitious ang mga pangalang nabanggit, dahil ni isa sa kanila ay hindi nagpunta sa nasabing warehouse para i-claim ito.

Ang 2,21 kilo ng shabu, 48 oil ampules at 12 pirasong maliit na plastic container na may mga lamang cannabis o marijuana at 69,870 tableta ng Valium at Mogadon ay naka-conceal sa limang package na dumating sa CMEC at FedEx warehouses sa magkakahiwalay na petsa.

Ang shabu ay tinatayang nagkakahalaga ng P14 milyon; ang Valium at Mogadon ay aabot sa P1.496 milyon, habang hindi pa malaman kung ano ang street value ng marijuana.

Ipinasa ng BOC ang kustodiya ng mga droga sa pamamahala ng PDEA. (JSY)