Thursday , October 18 2018
Breaking News
You are here: Home / Opinion / Impeachment at Quo Warranto, isang paliwanag (Wakas)

Impeachment at Quo Warranto, isang paliwanag (Wakas)

NGAYON na natalakay na natin kung ano ang Impeachment, Quo Warranto, kung sino si Maria Lourdes PA Sereno; at napag-usapan na rin natin mga pangyayari o bagay-bagay bago ang kontrobersiyal na pagkakatanggal sa dating punong mahistrado ay susubukan nating lagumin ang mga pangyayari.

Bagamat may legal na opinyon ang Usaping Bayan kaugnay ng mga pangyayari ay hindi na natin tatalakayin ito nang malalim dahil marami nang gumawa noon. Lilinawin lamang natin ang mga bagay-bagay at bahala na kayong mga mambabasang magsabi kung ano talaga ang dapat na nangyari.

Malinaw na

Malinaw na ngayon sa atin na ang Impeach­ment ay isang prosesong politikal at paraan upang matanggal sa poder ang Pangulo ng Republika, ang Ikalawang Pangulo, ang mga mahistrado ng Korte Suprema, mga komisyoner ng Civil Service Commission (CSC), Commission on Elections (COMELEC), Commission on Audit (CoA), at ang Ombudsman. Samantala, malinaw na rin na ang Quo Warranto ay isang administratibong paraan upang maalis sa poder ang isang pinaniniwalaang naupo sa posisyon na may kulang o walang kuwalipikasyon.

READ MORE:  Paunawa

Malinaw na rin na maraming nasagasaan si dating Pangulong Benigno Simeon Aquino III nang kanyang iupo si Sereno bilang Chief Justice ng Korte Suprema, at karamihan sa kanila ay siya ring nagdesisyon kamakailan na alisin siya sa puwesto matapos ang anim na taon.

Malinaw na tinanggal si Sereno hindi dahil sa nakagawa siya ng krimen laban sa bayan o kabang bayan tulad ng tinatawag na culpable violation of the Constitution, treason, bribery, graft and corruption, other high crimes, or betrayal of public trust. Siya ay tinanggal dahil lang sa isang tinatawag na kapalpakang administratibo, dahilan para isipin natin na hindi ito talaga ang dahilan ng pagkakasipa sa kanya.

Pansinin na hindi tahasang sinabi ng pamunuan ng University of the Philippines, kung saan nagturo nang mahigit sa sampung taon ang dating Chief Justice bago nanungkulan sa Korte Suprema, na hindi nag-file si Sereno ng Statement of Assets, Liabilities and Net worth (SALN). Bagkus ang pagkakasabi niya ay hindi lamang makita ang kanyang mga papeles.

READ MORE:  Ingrato?

Sa ngayon ay matatag na naninindigan pa rin si Sereno na nag-file siya ng kanyang SALN sa lahat ng panahon, at hindi lamang makita ang mga ito ng mga ahensya ng pamahalaan kung saan nai-file ang mga papeles, dahil na rin sa kalumaan ng siste sa filing. Hindi ba’t totoo naman na may pagkakataon na nawawala ang mga papeles sa mga ahensya ng pamahalaan at hindi lamang kay Sereno nangyayari ito?

Dahil dito ay ikinonsidera ng Judicial and Bar Council, na noo’y pinamumunuan ni Associate Justice Diosdado Peralta, na kompleto ang kanyang kuwalipikasyon para maging pinuno ng Korte Suprema. Malinaw na kung kulang man ang SALN sa papeles na inihain ni Sereno bago siya inendoso para sa pagka-Chief Justice ay legal na pinalagpas ng JBC at kung tutuusin ang may sala rito ang nasabing konseho.

READ MORE:  Kulelat sa senatorial race

Bilang pang­huli, naniniwala ang Usaping Ba­yan na ang dapat nangyari sa Quo Warranto ni Solici­tor General Jose Calida ay ibinasura ito o dili kaya ay itinuring lamang na ebidensiya sa isang fact finding investigation ng Korte Suprema. Hindi rin dapat nakisangkot sa pagdinig ng Quo Warranto ang mga hiniling na mag-inhibit sa proseso alang-alang man lamang sa delicadeza.

Ngayon, kung ano man ang findings ng fact finding probe, dapat ay inendoso ng Korte Suprema sa House of Representatives para ga­miting ebidensiya sa Impeachment trial sa Senado.

Sa huli, naniniwala pa rin ang Usaping Bayan na ang Senado ang dapat humusga kay Sereno.

***

Pasyalan ninyo ang Beyond Deadlines sa www.beyonddeadlines.com para sa mga balita sa ating nagbabagang panahon. Sana ay makaugalian ninyo na bisitahin lagi ang website ng Beyond Deadlines. Salamat po. Pasyalan nyo rin ang pahayagang Hataw sa hatawtabloid.com kung saan lumalabas din ang Usaping Bayan tuwing Miyerkoles at Biyernes.

COMMENTS

About Nelson Forte Flores

Scroll To Top
 

Copyright hatawtabloid.com | All Rights Reserved