Sunday , November 18 2018
Breaking News
You are here: Home / Opinion / Tuloy ang 2019 midterm elections
Tuloy ang 2019 midterm elections

Tuloy ang 2019 midterm elections

PALUTANG lang ni House Speaker Pantaleon “Bebot” Alvarez ang sinasabi niyang hindi ma­tutuloy ang 2019 midterm elections.  Isa ito sa pamamaraan ni Alvarez para makakuha ng maraming suporta sa Senado at Kamara na pawang last termer para tuluyang mailusot ang Charter change.

Suntok sa buwan ang no-election scenario sa 2019 kung titingnang mabuti ang mga nangyayari sa ating politika. Una, ang sinasabing constituent assembly ay naghihingalo na dahil mga senador na ang umalma sa asal-barumbado nitong si Bebot.

Pangalawa, ang sinasabing plebesito ni Alvarez ay halos ‘patay’ na rin dahil sa kawalan ng budget at oras para ipatupad ito o pagbotohan ng taongbayan. Si Senador Chiz Escudero na ang nagsabing walang pondo para sa plebesito at pati na ang Comelec ay nagsabi na wala na rin panahon para ipatupad ito.

READ MORE:  Good job BoC!

Kahit maglupasay at sumirko-sirko pa si Alvarez, walang mangyayari sa kanyang isinusulong na Cha-cha. Halos lahat ng sector ng lipunan ay tutol na ngayon sa Cha-cha dahil na rin sa kagagawan nitong si Alvarez.

Alam ng taongbayan na karamihan sa mga politiko ay pansariling interes lamang ang gusto kaya gustong ipilit ang Cha-cha. Obvious na term extension ang gusto ng pangkat nitong si Alvarez. Atat na atat makapanatili sila sa kanilang kapangyarihan.

Wala naman talagang problema kung ituloy man ang Cha-cha na gustong mangyari ni Pa­ngulong Rodrigo “Digong” Duterte, ang problema lamang ay itong si Alvarez na ngayon pa lamang ay nagpapakita kung ano talaga ang kanilang motibo para maisulong ang Cha-cha.

READ MORE:  Francisco Reyes (Busuanga) airport malayong-malayo sa sibilisasyon! (Attention: DoTC & CAAP)

Kung tutuusin, kakaunti lang ang mga politiko na makikinabang sa term extension sa pagpapatupad ng federalismo kung ikokompara sa taongbayan na gustong ituloy ang eleksiyon sa 2019.

Kaya nga sorry na lang sa grupo ni Alvarez dahil ngayon pa lang mukhang abala na ang mga politikong tatakbo sa midterm election at wala silang pakialam sa mga pananakot ni Alvarez para maisulong lang ang Cha-cha.

READ MORE:  Fuel hike agad-agad, fare hike komplikado sa implementasyon

Sina Sen. Grace Poe, Nancy Binay, Cynthia Villar, Sonny Angara, Bam Aquino at JV Ejercito na pawang mga reelectionists ay mai­ngay na sa media kabilang na rin si Ilocos Norte Governor Imee Marcos, Rep. Karlo Nograles, Rep. Geraldine Roman, Rep. Abelardo Benitez.

At paano rin mapipigil ni Alvarez ang mga politiko sa kani-kanilang probinsiya na nasa election mode na?  Kahit na takutin pa sila ni Alvarez, wala silang pakialam sa federalismo, ang tanging pinaghahandaan nila, ang darating na eleksiyon sa kanilang mga lalawigan.

Kawawa naman itong si Alvarez, mukhang nahihibang na sa kapangyarihan, gusto yatang lagpasan pa si Digong.

COMMENTS

About Mat Vicencio

Scroll To Top
 

Copyright hatawtabloid.com | All Rights Reserved