Wednesday , December 13 2017
Breaking News
You are here: Home / Sports / Gilas dadayuhin ng Chinese Taipei (Homecourt advantage!)
Gilas dadayuhin  ng Chinese Taipei (Homecourt advantage!)

Gilas dadayuhin ng Chinese Taipei (Homecourt advantage!)

NAKASANDAL sa pambihirang homecourt advantage, tatangkaing dumalawang sunod na panalo ng Gilas Pilipinas kontra sa dayong Chinese Taipei sa pagpapatuloy ng FIBA World Cup Asian Qualifiers ngayon sa inaasahang aapaw na Smart Araneta Coliseum.

Magsisimula ang aksiyon 7:00 ng gabi para subukan ng pambato ng Filipinas na maisukbit ang 2-0 kartada upang masolo ang unahan ng Pool B ng Asian Qualifiers na magiging batayan kung sino ang makapapasok sa FIBA World Cup sa 2019 sa China.

Sasakyan ng Gilas ang pambihirang 77-71 panalo sa Tokyo noong nakaraang Biyernes kontra Japan sa pangunguna nina Jayson Castro at Andray Blatche.

Sinementohan ang kanyang kartada bilang two-time Best Point Guard in Asia, tinabunan ni Castro ang mga Hapon sa kanyang 20 puntos, 7 rebounds at 6 assists kabilang ang dalawang magkasunod na tres sa huling dalawang minuto upang pigilan ang pagbalik ng Japan mula sa pagkakaiwan sa 12 puntos.

Nag-ambag ang naturalized player ng Gilas na si Blatche ng 13 puntos at 12 rebounds habang mayroon 12 at 10 puntos ang mga kamador na si Matthew Wright gayondin ang kapitan ng Gilas na si Gabe Norwood.

Samantala, makahaharap nila ang gutom sa panalong Chinese Taipei matapos makalasap ng nakapanlulumong 66-104 kabiguan sa Australia sa sariling homecourt sa Taipei Heping Gymnasium.

Pangungunahan ng naturalized import na si Quincy Davis ang tangka nilang pagsilat sa Filipinas matapos kumayod ng 17 puntos, 5 rebounds, 4 steals at dalawang supalpal kontra sa Australia.

Sa kabilang banda, tangka ng Australia ngayon ang 2-0 kartada kontra sa dayong Japan sa krusyal na sagupaang gaganapin sa Adelaide.

ni John Bryan Ulanday

COMMENTS

About John Bryan Ulanday

Scroll To Top

Copyright © 2009 - 2017 hatawtabloid.com