Tuesday , December 12 2017
Breaking News
You are here: Home / News / Suspek sa Atio hazing slay ‘nagparamdam’
Suspek sa Atio hazing slay ‘nagparamdam’

Suspek sa Atio hazing slay ‘nagparamdam’

NAGPADALA si Antonio Trangia, isa sa tatlong suspek sa hazing na ikinamatay ni University of Santo Tomas (UST) freshman law student Horatio Tomas “Atio” Castillo III, ng surrender feelers sa mga awtoridad, pahayag ng Manila Police District (MPD) nitong Linggo.

Si Trangia, miyembro ng Aegis Jvris fraternity, ang may-ari ng sasakyan na ginamit sa paghahatid kay Castillo sa Chinese General Hospital, makaraan ang hazing noong 16 Setyembre.

“He sent feelers already to facilitate his surrender and even the surrender of the vehicle,” pahayag ni MPD chief Senior Supt. Joel Coronel.

“Hopefully, within the day until tomorrow, before the Senate hearing, he’ll be appearing here to clarify his participation or involvement. Otherwise, he is still considered a principal suspect.”

Ang anak ni Trangia, si Ralph, opisyal ng Aegis Jvris Fraternity, kabilang sa itinuturing na primary suspect sa pagkamatay ni Castillo, ay nakalipad na patungo sa Chicago, USA.

Sinabi ni Coronel, ang ina ni Ralph ay maaaring humarap sa kaso kapag napatunayang tinulungan niya ang kanyang anak na makaalis ng bansa.

Si John Paul Solano, ang pangatlong suspek, ay sumuko sa mga awtoridad.

Magugunitang si Solano, ang gumawa ng ‘kuwentong’ natagpuan niya ang duguang katawan ni Castillo sa Tondo, Maynila, makaraan ang hazing rites ng Aegis Jvris Fraternity nitong nakaraang linggo.

Kalaunan, siya ay itinuring na suspek dahil sa sertipikasyon at kopya ng CCTV ng barangay na nakasasakop sa lugar na ‘peke’ ang kanyang testimonya.

PAMILYA CASTILLO
TINANGKANG SINDAKIN

NAGPADALA ng mga tauhan ang pulisya sa burol ng hazing victim na si Horacio Tomas “Atio” Castillo III, makaraan ang hinihinalang pagtatangkang sindakin ang kanyang pamilya, ayon kay Migs Zubiri.

“Noong isang araw, may dumating ditong ‘di nila kilala, parang sina-psychological ano si Tito, ‘yung tatay ni Atio… Sinabihan siya na medyo siga, ang dating na ‘E ano, anong plano n’yo na ‘yun?” sabi sa mga reporter ni Zubiri, kaibigan ng pamilya Castillo.

Ayon kay Zubiri, balak sana ng pamilya Castillo na kumuha ng security agency, ngunit humingi na lang sila ng tulong kay Director General Ronald Dela Rosa, hepe ng Philippine National Police.

“Kaagad-agad nagpadala siya (Dela Rosa) ng pulis dito, plainclothes na policemen. In cases like this kasi, ‘di mo maiiwasan na may mapikon din sa ‘yo,” ani Zubiri.

“Siyempre although biktima ang pamilya ni Atio, ang problema ang kaaway nila medyo influential, ma-impluwensiya. So we have to be cautious at all times.”

SOLANO ‘KAKANTA’
SA SENATE PROBE

ILALAHAD ng pangunahing suspek sa pagkamatay ni Horacio Tomas “Atio” Castillo III sa initiation rites ng isang fraternity, ang lahat ng kanyang nalalaman hinggil sa insidente, sa isasagawang imbestigasyon sa Senado ngayon, pahayag ni Senador Panfilo Lacson nitong Linggo.

Sinabi ni Lacson, ibubunyag ni John Paul Solano, miyembro ng Aegis Juris Fraternity, ang kanyang nalalaman hinggil sa insidente ng hazing, sa Manila Police District (MPD).

“Hindi lang bukas, kundi maging sa MPD. Sinabi niya na baka sa formal investigation na lang ako magbigay ng detalye,” dagdag ni Lacson.

Ikinonsidera si Solano bilang pangunahing suspek sa pagkamatay ni Atio dahil sa pagbibigay ng mga maling impormasyon sa pulisya gaya ng kung saan at paano niya natagpuan si Atio.

Nitong Biyernes, sumuko si Solano kay Lacson, na siyang nagdala sa kanya sa MPD.

Gayonman, sinabi ni Lacson, wala pang sinasabi sa kanya si Solano hinggil sa insidente.

“Ayaw niyang magbigay ng detalye. Ang sinasabi niya magbibigay na lang siya ng detalye pagharap niya sa formal investigation.”



COMMENTS

About hataw tabloid

Scroll To Top

Copyright © 2009 - 2017 hatawtabloid.com