Tuesday , October 16 2018
Breaking News
You are here: Home / Opinion / Illegal terminal sa Plaza Lawton bawal kotongan

Illegal terminal sa Plaza Lawton bawal kotongan

PATUNAY na talagang ugat ng krimen ang illegal terminal na pinatatakbo ng sindikato sa Plaza Lawton sa Maynila na malimit nating itampok sa pitak na ito, tatlong miyembro ng Manila Police District (MPD) na naaktohang nangongolekta ng “TONG” ang nadakip ng mga kapwa nila pulis, kamakailan.

Huli sa ikinasang entrapment ng Philippine National Police Counter Intelligence Task Force (PNP-CITF) si PO2 Joseph Tecson Buan at 2 pang kasamahang pulis-MPD nitong nakaraang Biyernes sa hindi nasasawatang illegal terminal na matagal nang bumababoy sa sagradong monumento ni Gat Andres Bonifacio sa Lawton.

Tatlong bus companies na pumaparada sa illegal terminal sa Lawton ang ayon sa balita, ay kabilang sa kinokolektahan ni Buan at ng mga kasamahang pulis sa MPD ng protection money kada linggo.

Sa katotohanan, hindi pinapayagang pumasok sa Maynila ang mga metro at provincial bus, liliko pakaliwa sa Vito Cruz mula Roxas Blvd. at iikot sa Taft Avenue pabalik sa pinanggalingan ang mga biyaheng South.

READ MORE:  Legal ba ang LINA CMO 12-2016

Pero ang nakapagtataka ay kung bakit pinapayagan na makarating hanggang Lawton ang mga bus ng tatlong kompanya.

Maliwanag na timbrado sa Manila City Hall ang tatlong bus companies na kinokotongan ng grupo ni Buan kaya sa dinami-rami ng bus company ay tatlong kompanya lamang ang exempted na malayang makabiyahe hanggang sa Lawton at puwede pang makapag-terminal sa paligid ng Central Post Office Bldg. sa Lawton.

Kung labag sa batas ang extortion, labag din sa batas ang illegal terminal na matagal nang nagpapayaman sa sindikato at mga tiwali sa Manila City Hall at MPD.

READ MORE:  Blue Meadows Low Cost Housing sa Caloocan City ‘tinatarahan’ Sa Building Permit? (Sa ilalim ng High Density Housing – Social Housing Finance Corp. (HDH-SHFC))

Sana ay inaresto rin ng PNP-CITF ang mga driver ng bus company at kanilang operator, lalo na ang sindikatong nasa likod ng illegal terminal.

‘Yan naman ay kung hindi kasali ang PNP-CITF at ang Metro Manila Development Authority (MMDA) na nasusuhulan sa raket ng sindikatong nagpapalakad ng illegal terminal sa Lawton.

Hindi ba mas tumpak na ang illegal terminal mismo ang dapat unahing buwagin ng PNP-CITF?

Teka nga pala, sino ang nagsumbong sa PNP-CITF sa extortion activities ng pulis-MPD na si Buan at kanyang grupo, ang mga operator ng bus company o ang untouchable na utak ng sindikato ng illegal terminal sa Lawton, aber?

Para sa akin, mas kapani-paniwala na ang operator na ayaw mabawasan ang malaking kinikita sa illegal terminal ang nagpahuli kay Buan at sa dalawa pa niyang kasama.

READ MORE:  Cocaine, ecstasy ‘di umubra sa QC; at bookies lotteng, EZ2 sa Antipolo at Pasig

Mahigit sampung taon ang nakararaan, isang dating pulis na nagngangalang Benavidez na karibal sa illegal terminal sa Lawton ang pinatay.

Isang anak naman ng dating piskal sa Maynila ang inambus at pinatay rin na sinasabing kagagawan din ng sindikato ng illegal terminal sa Lawton.

Sentido kumon lang, kung walang illegal terminal ay tiyak na walang mangongotong.

MMDA chairman Gen. Danilo Lim, kaya mo bang ipabuwag ang illegal terminal na ‘yan na matagal nang namamayagpag sa Lawton?

Ang magandang abangan ay kung si Chairman Danny Lim o ang illegal terminal sa Lawton ang unang mabubuwag.

(Para sa anumang sumbong at reaksiyon, mag-text o tumawag sa 09174842180. Maaring ipadala ang inyong liham sa e-mail address: [email protected])

KALAMPAG – Percy Lapid

COMMENTS

About Percy Lapid

Scroll To Top
 

Copyright hatawtabloid.com | All Rights Reserved