LEGAZPI CITY – Nagpapagaling na ang biktimang nabangga ng motorsiklo habang hindi pinalad na makaligtas ang driver ng nasabing sasakyan makaraan ang insidente sa bayan ng Daraga kamakalawa.
Ayon sa ulat ng pulisya, binabaybay ng driver ng motorsiklo na si Eric Nuñez, residente ng P4, Brgy. Bañadero, Daraga ang kahabaan ng Purok 1 Bonga, galing sa Brgy. Matanag nang mabangga niya ang biktimang naglalakad sa kanang bahagi ng kalsada.
Sa lakas ng impact, parehong bagsak sa kalsada ang driver ng motorsiklo at pedestrian na si Alejandro Baytan, 57, na agad itinakbo sa ospital.
Ayon kay Chief Insp. Arthur Gomez, tagapagsalita ng Albay PPO, tumama sa sementadong parte ng kalsada ang ulo ni Nuñez at idineklarang dead on arrival.
Samantala, himalang nagalusan at napilay lamang si Baytan.
Nabatid na walang suot na helmet ang driver nang mangyari ang insidente.