DALAWA ang patay at isa ang sugatan sa nangyaring hostage incident sa loob ng SM mall sa Dasmariñas, Cavite nitong Linggo.
Kinilala ni dating Cavite governor Jonvic Remulla ang hostage taker na si Carlos Marcos Lacdao, 32, tubong lalawigan ng Leyte.
Ayon kay Remulla, nakapuslit si Lacdao sa mall dala ang 12-inch kutsilyo at kanyang ini-hostage ang 12 katao sa loob ng isang CR sa ground floor ng mall dakong 11:00 am.
Hinahanap ni Lacdao ang kanyang misis at sinasabing “lover” ng ginang.
Sa salaysay ni Remulla, naka-shades, naka-backpack at balisang-balisa si Lacdao habang nagmumura, sumisigaw at hinahanap ang “lover” ng kanyang misis.
Dagdag ni Remulla, nagtatrabaho ang asawa ni Lacdao sa naturang mall bilang janitress.
Ngunit inilinaw niyang hindi kabilang sa mga na-hostage ng suspek ang kanyang misis.
Unang nakatakas na walang sugat ang siyam sa mga hostage habang nagpapatuloy ang insidente.
Ngunit dalawang hostage ang sinaksak ng suspek, ang isa sa kanila ay namatay dahil sa saksak malapit sa kili-kili.
Aniya, natapos ang insidente dakong 2:55 pm nang magdesisyon ang mga pulis na barilin na si Lacdao na tinamaan ng bala sa ulo at leeg.
Binaril ng mga pulis si Lacdao nang tutukan ng kutsilyo ang isa sa mga babaeng hostage na kinilalang si Mylene Balajadia na masuwerteng nakaligtas.
Samantala, sinabi ni Cora Guidote, SM senior vice-president for investor relations, nagsimula ang insidente bilang “domestic problem” na dinala lamang sa mall.
HATAW News Team