86-anyos lola patay sa sunog

CEBU CITY – Hindi nakalabas nang buhay ang isang 86-anyos lola nang ma-trap sa loob ng kanyang nasusunog na bahay sa Brgy. Malolos, bayan ng Barili kahapon.

Ayon kay FO1 Dennis Villa sa Barili Fire Station, nagluluto ang biktimang si Dionisia Empinado nang mangyari ang insidente.

Sinasabing napansin na lang ng mga kapitbahay ng biktima na lumiyab ang bahay ng matanda.

Natagpuang sunog ang katawan ng biktima sa loob ng kanyang bahay na pinaniniwalaang hindi agad nakalabas dahil mahina na dala ng katandaan at panglalabo ng mga mata.

Pinaniniwalaan ng mga bombero na nahulog ang baga sa uling na ginamit sa pagluto ng biktima dahilan nang pagliyab ng apoy.