Maraming plano ang Dangerous Drugs Board (DDB)

Marami na namang inilalatag na plano si Dangerous Drugs Board (DDB) Chairman, Dr. Benjamin Reyes.

Napanood at narinig natin siya sa isang pang-umagang TV program na ibinibida (na naman?) ang kanilang programa.

Siyempre normal lang ‘yan. Maglatag ng pla-no lalo’t siya ang bagong chairperson ngayon.

Pero gusto lang natin tawagin ang pansin ni Chairman Reyes, ilang taon na po kayo riyan sa DDB!? Sana ang marinig namin kung ano na ang mga nagawa ninyo noon mga nakaraang taon?!

Sabi ninyo, hindi kukulangin sa 1.8 milyong Pinoy ang gumagamit ng ilegal na droga o ‘yung mga tinatawag na adik.

E ang tanong lang po, Mr. Chairman, bakit?!

Bakit dumami nang ganyan ang mga adik sa ilegal na droga?! Ano ba ang ginagawa ninyong mga taga-DDB sa mga nakalipas na taon?

Ang ibang ahensiya ng pamahalaan gaya ng PDEA, ang papel nila ay hulihin, kasuhan o ipasok sa drug rehab center ang mga nahuhuli nilang lulong sa droga.

Ibig sabihin, law enforcement sila.

E ang DDB?

Ano ba ang papel para mapigilan ang

pagdami ng mga nalulong sa ilegal na droga?!

Don’t act na parang bago lang kayo riyan sa DDB Mr. Chairman, inugat na nga kayo sa tagal ninyo riyan pero hanggang ngayon wala pa kayong mainam na formula kung paano makokontrol ang pagdami ng mga adik?!

Aba, ‘wag puro dakdak at magtrabaho na kayo, Mr. Chairman!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN – Jerry Yap