ITINAAS ni Davao City Mayor Sara Duterte sa P3 milyon ang patong sa ulo ng mga suspek sa likod ng pagpapasabog sa Davao City.
Inianunsiyo ito ng alkalde sa press conference kahapon, makaraan ilabas ng pulisya ang artist’s sketch ng pangunahing suspek sa pagsabog sa Roxas Night Market.
PRIME SUSPECT TUKOY NA
TUKOY na ng PNP ang pagkakakilanlan ng pa-ngunahing suspek na nag-iwan ng bomba sa night market sa Roxas Street sa Davao City nitong Biyernes.
Ayon kay PNP chief, Director General Ronald “Bato” Dela Rosa, positibong natukoy ang suspek base sa testimonya ng dalawang testigong masahista.
Nakilala aniya ang suspek kahit may takip ang kanyang mukha sa pamamagitan ng pagpresenta sa mga testigo ng 20 larawan o portraits na nagpapakita ng “features” sa mukha.
Gayonman, ayaw pang pangalanan ng PNP chief ang suspek ngunit ang malinaw ay alam na ng pulisya saan maaring nagtatago.
Samantala, kinompirma ni Bato na miyembro ng isang teroristang grupo ang suspek bagama’t ayaw muna niyang banggitin ang pangalan ng grupo dahil may “ongoing operasyon” na ikinakasa ang PNP.
Naglunsad na ng manhunt operation ang PNP laban sa nasabing suspek.