Friday , March 29 2024

Aklat ng Bayan publikasyon para kay Juan

082916 KWF aklat bayan
SIYAM na aklat ng klasikong akda na isinalin sa Filipino at kritika sa anyong sanaysay ang itinampok ng Komisyon sa Wikang Filipino (KWF) sa paglulunsad ng Aklat ng Bayan sa Bulwagang Romualdez sa Watson Building, JP Laurel St., Malacañan Complex, San Miguel, Maynila kahapon. Nasa larawan, mula sa kaliwa, ang mga nagsalin na sina MJ Tumamac a.k.a. Xi Zuq sa Peter Pan ni James Matthew Barrie; Allan Derain (Ang Kuwintas at iba pang Kuwento); Nicholas Pichay, Haring Lear ni William Shakespeare; Ferdinand Pisigan Jarin, Paglalakbay sa Pusod ng Daigdig ni Jules Verne; at Ergoe Tinio, Frankenstein ni Mary W. Shelley. Gayon din ang Sa Praga: Mga Piling Tula ni Jaroslav Seifert ng LIRA; El Consejo de los Dioses at Junto al Pasig, salin nina Virgilio Almario at Michael Coroza; at Pandiwa Taon 2 Bilang 1 na edit ni Kom. Purificacion Delima. (BONG SON)

MURA AT KALIDAD.

Ito ang iginagarantiya ng Komisyon sa Wikang Filipino (KWF) sa kanilang proyekto na Aklat ng Bayan.

Kasabay ng patuloy na pagdiriwang ng KWF sa Buwan ng Wika na may temang “Filipino: Wika ng Karunungan” ay opisyal na inilunsad ang matagal nang pangarap ng komisyon na “Aklatan ng Karunungan” o ang Aklat ng Bayan.

Malaki ang naitutulong ng Aklat ng Bayan sa mga mambabasang Filipino, bunga ng paglilimbag ng mga aklat pang-ortograpiya, pangkultura, at mga klasikong akdang isinalin sa wikang Filipino.

Unang inilunsad ang naturang proyekto noong 2013 nang umupo si Ginoong Virgilio S. Almario bilang tagapangulo ng KWF.

Pinasimulan ito upang isakatuparan ang pangarap nilang Aklatan ng Karunungan o Library of Knowledge, alinsunod sa 1987 Konstitusyon, na nagsasaad ng pagpapalago ng wikang Filipino sa edukasyon.

Ani Binibining Louise Adrianne O. Lopez, junior editor ng Aklat ng Bayan, bukod sa nasusulat na adhikain ng proyekto, layon ng programa na maiparating sa mas maraming mambabasang Filipino ang mga makabuluhan at premyadong akda sa mababang halaga.

082916 KWF aklat bayan 2

Ayon kay Lopez, sinadyang ibenta ang mga aklat sa ganitong halaga upang maging abot-kaya ng masa. Sa kabila ng murang halaga ng mga aklat, sinisiguro ng mga manunulat, tagasalin, at editor sa komisyon na de-kalidad ang mga akdang inililimbag nila taon-taon.

Nasisiguro ng mga kawani ng KWF na wasto ang paggamit nila ng wika sa mga akda, sa-pagkat dumaraan ito sa pagsusuri ni Tagapangulong Almario. Bukod dito, sinisiguro ng tagapangulo na makatutulong sa mga mambabasa ang lathalain bago ito aprubahan.

Suportado ng Pambansang Komisyon para sa Kultura at mga Sining o National Commission for Culture and the Arts (NCCA) ang adhikain ng KWF, ang patuloy na pagpapayabong sa wikang Filipino, kaya tumutulong sa aspektong pinansiyal.

Bukod sa mga aklat pang-ortograpiya, mga kuwento mula sa mga panitikang katutubo, manwal, atlas, at mga klasikong akdang isinalin sa Filipino na maaari nang mabili sa KWF, maraming kaabang-abang na proyekto ang inihahanda ng Aklat ng Bayan para sa susunod na taon.

Sa pagpapatuloy ng pagsasalin ng classics, ay tutuon ang Aklat ng Bayan sa mga pananaliksik sa iba’t ibang kultura at wikang etniko.

Dagdag ni Lopez, dapat abangan ang salin ng obra ni Plato na The Republic, na nakatakdang isalin ng Pambansang Alagad ng Sining para sa Panitikan at tagapangulo ng komisyon na si Almario.

“Hinihiling at ipinagdarasal namin na maipagpatuloy ang proyektong ito, magkaroon man ng pagbabago sa pamunuan” ani Lopez.

Umaasa ang komisyon na lalong tumatag ang adbokasiya nitong “Aklat ng Karunungan,” sa tulong ng mga mananaliksik, tagasalin, at manunulat na masigasig na pinangangalagaan ang wikang Filipino.

nina Joana Cruz at Kimbee Yabut

About Joana Cruz Kimbee Yabut

Check Also

Notoryus na wanted holdaper sa NCR, todas sa enkwentro sa Batangas!

Notoryus na wanted holdaper sa NCR, todas sa enkwentro sa Batangas!

NASAWI ang isang lalaki na tinaguriang kilabot na holdaper at akyat bahay na kabilang sa …

Las Piñas Mass Wedding Kasalang Bayan

Sa ika-27 anibersaryo ng Las Piñas
102 COUPLES SABAY-SABAY NA IKINASAL

SA PAGDIRIWANG ng Buwan ng Kababaihan at ika-27 anibersaryo ng pagkakatatag bilang lungsod ang Las …

Buhain Richard Bachmann

Buhain, umayuda sa HB Bills para sa PH Sports

Pinangunahan ni Batangas 1st District Congressman Eric Buhain ang pagtalakay at pagsuri sa mga isinusulong …

Acuzar mapang-asar KALBARYO NG MARALITA ITINANGHAL SA NHA, DHSUG, PANAGHOY IWINASIWAS NG GRUPONG URBAN POOR

Acuzar mapang-asar  
KALBARYO NG MARALITA ITINANGHAL SA NHA, DHSUG, PANAGHOY IWINASIWAS NG GRUPONG URBAN POOR

MAHIGIT 300 informal settler families (ISFs) at civil society organizations (CSOs) ang nagtanghal ng Kalbaryo …

PNVF Volleyball

Philippine National Volleyball Federation (PNVF) Under-18 Championship 2024

MAGSISIMULA ang Philippine National Volleyball Federation (PNVF) Under-18 Championship 2024 ngayong linggo simula sa Biyernes …

Leave a Reply

Your email address will not be published. Required fields are marked *