1 patay, 9 sugatan sa bus at truck sa Quezon Province

NAGA CITY – Patay ang isang babae sa banggaan ng trailer truck at pampasaherong bus sa Brgy. Santa Catalina, Atimonan, Quezon kamakalawa.

Kinilala ang namatay na si Marry Shaine Oas, 22-anyos, residente ng Minalabac, Camarines Sur.

Ayon sa ulat, habang binabaybay ng truck na minamaneho ni Ruperto Santos II, 31-anyos, ang pababang kalsada sa nasabing lugar nang mawalan ito ng preno.

Bunsod nito, nahagip ng truck ang kasalubong na Isarog Line Bus na minamaneho ni Noel Cabrito, 50-anyos.

Dahil sa lakas ng impact ng salpukan, sugatan ang dalawang driver gayondin ang mga sakay ng bus na sina Ramon Albuis, 61; Victor Sayno, 58; Shiela Plata, 38; Glecyden Nolasco, 30; Porfereio Abunite Jr., 26; Ramon Albius, 22, at ang pahinante ng truck na si Albert Almonte, 19.

Samantala, patuloy na pinaghahanap ng mga awtoridad ang isa pang pahinante ng truck na si Arvin Borigas, sinasabing nawala makaraan tumalon mula sa truck.

Pinaniniwalaan ng mga awtoridad na naipit si Borigas sa nasabing sasakyan.