HATAW! D'yaryo ng Bayan hatawtabloid.com
INAKO ni Purefoods Star head coach Jason Webb ang responsibilidad sa masakit na pagkatalo ng Hotshots kontra Barangay Ginebra San Miguel sa Smart BRO PBA Philippine Cup quarterfinals kamakalawa ng gabi sa harap ng halos 22,000 na katao sa Mall of Asia Arena sa Pasay.
Sinayang ng Hotshots ang kanilang 74-56 na kalamangan sa huling quarter at yumukod sila sa Gin Kings sa overtime, 92-89.
Dahil sa pagkatalong ito ay tuluyang nagbakasyon ang Star sa torneo.
“I don’t think I got a passing grade,” wika ni Webb. “The only passing grade is if you win a championship.”
Naipasok ni LA Tenorio ang kanyang pamatay na tres kasabay ng busina upang makumpleto ng Ginebra ang milagrong panalo.
Matatandaan na pinalitan ni Webb si Tim Cone sa paghawak ng Star pagkatapos na lumipat si Cone sa Ginebra.
“I just feel bad for coach Jason, he out-coached me the whole game tonight,” ani Cone.
Wala pang susunod na plano ang pamunuan ng Star tungkol kay Webb ngunit inaasahang magbibitiw siya sa kanyang trabaho upang asikasuhin ang kanyang kampanya sa eleksyon sa susunod na taon kung saan sisikapin niya na muling mahalal siya bilang konsehal sa Paranaque City.
( James Ty III )
