Tolentino, iaangat pa ang kalidad ng Pinoy movies

SA pagharap ni dating MMDA Chairman Francis Tolentino sa entertainment press, sinabi nitong maghaharap siya ng panukalang batas na magtatakda hindi lamang ng tax reduction kundi magbibigay ng subsidy sa mga mahuhusay na pelikula.

Maganda ang balak na ito ni Chairman Tolentino sakaling palarin nga siya sa Senado. Hindi na rin kasi namin mabilang ang mga politikong nangako ng ganito sa tuwing may eleksiyon. Subalit ang lahat ay nauuwi lamang sa pangako.

Sakaling palarin si Tolentino at kung tutuparin niya ang sinabing ito, malaki ang maitutulong nito sa industriya para sumiglang muli ang pelikulang Filipino.

Kapag nagkaroon kasi tayo ng ganitong batas, makagagawa pa tayo ng mas maraming magaganda at de kalidad na pelikula. Hindi lamang kasi tayo makagawa dahil sa kakulangan ng suporta mula sa gobyerno. Kulang na kulang ang budget natin kaya ‘wag magtaka kung marami pa ring pipitsuging pelikula ang ating napapanood.

Hangad naming maiangat nga ni Tolentino ang kalidad ng Pinoy movies kung sakali dahil tiyak din na makapagbibigay ito ng maraming trabaho sa atin.

SHOWBIZ KONEK – Maricris Valdez Nicasio