Nine-Dash Line ng China walang basehan — PH

SUMENTRO ang argumento ng Filipinas sa Permanent Court of Arbitration, sa kawalan ng basehan ng Nine-Dash Line claim ng China sa West Philippine Sea.

Sinabi ni Deputy Presidential Spokesperson Abigail Valte, si Solicitor General Florin Hilbay ang nagharap ng daloy ng presentasyon ng Philippine delegation sa First Round of Arguments.

Ayon kay Valte, tinalakay ni Principal Counsel Paul Reichler ang historic rights claim ng China at iginiit na hindi ito nakasaad sa alin mang probisyon sa United Nations Convention on the Law of the Sea (UNCLOS).

Binanggit aniya ni Reichler na ang pag-aangkin ng China sa mga lugar na saklaw ng Nine-Dash Line ay nakasasagabal sa fishing at exploration activities ng Filipinas.

Samantala, si Professor Bernard Oxman ang tumalakay sa pagiging ilegal ng claim ng China at aniya’y nalalabag ang karapatan ng Filipinas na isang coastal state.

Habang sentro ng argumento ni Andrew Loewenstein ang kabiguan ng China na itatag ang claim nito dahil matagal na panahong hindi nagsagawa ng exclusive control ng mga nasabing karagatan o inaangking teritoryo.

Iniharap din ni Loewenstein ang walong mapang galing pa ng Ming Dynasty para patunayang hindi kasama sa teritoryo ng China ang mga islang inaangkin sa ilalim ng Nine-Dash Line.

Magpapatuloy ang pagdinig sa The Hague, Netherlands.