2 estudyante patay, 4 sugatan sa truck vs trike (Sa Quirino Province)

CAUAYAN CITY, Isabela – Patay ang dalawang estudyante habang sugatan ang apat iba pa makaraang banggain ng dump truck ang kanilang sinasakyang tricycle sa Saguday, Quirino kamakalawa.

Sa nakuhang impormasyon mula sa Saguday Police Station, ang dalawang namatay ay sina Kenneth Badil, 17, residente ng Brgy. Banuar, Cabarroguis, Quirino; at Shiela Castillo, 13, residente ng Brgy. San Leonardo, Aglipay, Quirino.

Habang ang mga sugatan ay sina Aloha Pukkaw, Hazel Jane Castillo, Judy Claire Sabado, at Valerie Ramos.

Sa pagsisiyasat ng PNP Saguday, ang mga biktima ay pauwi na sa bayan ng Aglipay nang agawan sila sa linya at salpukin ng truck na minamaneho ni Mortiner Tacadena, residente ng Brgy. Andres Bonifacio, makaraang unahan ang sinusundang sasakyan.

Sa lakas ng impact ng banggaan, tumilapon ang sinasakyang tricycle ng mga biktima.

Habang nahuli at dinala sa himpilan ng pulisya si Tacadena para sa kaukulang disposisyon at sasampahan ng kasong reckless imprudence resulting in homicide and multiple serious physical injuries with damage to property.