Duterte sa kuko ni Banayo

KUNG tunay ang programang isinusulong ni Davao City Mayor Rodrigo   Duterte laban sa katiwalian, bakit nasa kampo niya ngayon ang isang taong may kinalaman sa rice smuggling at may kasong graft sa Ombudsman?

Ang tinutukoy natin ay si dating National Food Authority administrator Lito Banayo na kasalukuyang  political strategist ni Duterte. Si Banayo ay kinasuhan ng National Bureau of Investigation (NBI) sa Ombusdman ng graft dahil sa kaugnayan umano sa kuwestiyonableng rice importation program ng NFA noong siya ay nakaupo pa rito.

Sinasabing si Banayo ang nagbigay sa mga piling rice importer,  kabilang na si David Bangayan, isang big-time smuggler, ng legal cover para sa importasyon ng bigas gamit bilang front ang mga koopera-tiba ng mga magasasaka.

Mukhang nabobola ni Banayo si Duterte.  Alam kaya ni Duterte na nag-aalaga siya ng buwaya sa loob ng kanyang grupo?  Sino pa ang maniniwala kay Duterte sa kanyang programang isinusulong tulad ng  peace and order at paglaban sa katiwalian kung mismong si Banayo na nahaharap sa kasong graft ay hindi niya kayang sibakin?

Nasaan na ang kamay na bakal ni Duterte?  Nasaan na ang sinasabing lalaba-nan niya ang rice smuggling sa bansa?

Yawa, way kamo upay!