Same sex marriage pag-aaralan  sa Kamara

SISIMULAN nang pag-aaralan ng Gabriela party-list ang posibilidad na isulong din ang same sex marriage sa bansa kasunod ng desisyon ng US Supreme Court para sa lahat ng estado ng Amerika.

Ayon kay Gabriela Rep. Luzviminda Ilagan, titingnan nila kung kakayaning maisulong ang laban sa same sex marriage sa loob at labas ng Kongreso.

Kailangan aniyang paghandaan nila itong mabuti dahil mabigat na isyu ito sa bansa.

Paliwanag ng mambabatas, nararapat din nilang piliin ang kanilang laban partikular sa isinusulong nilang diborsiyo sa harap na rin ng pahayag ni Pope Francis na pwedeng payagan ang paghihiwalay ng mag-asawa kung ito ay isang moral necessity.

Gayonman, aminado ang kongresista na panahon na para maging bukas ang isipan ng lahat sa isyu ng same sex marriage at aksiyonan ito at hindi lamang basta pag-usapan.

Ngunit malakas din ang pagtutol dito ng maraming mambabatas na tanging pinapaboran ang kasalang babae at lalake o tradisyonal na uri ng matrimonial ceremony.