Nasaan na nga ba ang manager ng Sexbomb na si Joy Cancio?

ni Vir Gonzales

NASAAN na nga ba si Daisy Siete producer Joy Cancio? Bakit bibihira na siyang makita at marinig simula noong magkawatak-watak ang grupong Sexbomb Dancers?

Si Joy ang producer ng Daisy Siete at nag-uso ng pamimigay ng mga souvenirs sa mga naiimbitahang press sa presscon. Hindi niya alintana, kung gaka-ba (gate crashers) ang pumupunta sa presscon ng mga alaga niya. Katwiran ng producer, basta hindi sa pader isinusulat o sa lupa, ang balita ukol sa Sexbomb, mga reporter pa rin ang mga iyon.

Pero ang tragedy lang sa showbiz, kung malakas ang rating mo, o mahina titigbakin ka pa rin kapag hindi nagustuhan ng mga higanteng bossing ng network. Biglang nawala ang Daisy Siete sa hindi malamang dahilan sa ere. Ang mahalaga, nakapag-iwan ng contribution ang kanyang Sexbomb.

Hindi malilimutan ng tao ang mga naging alaga niyang sina Rochelle Pangilinan, Jopay Paguia, Sunshine Garcia, Che Che, Sandy Tolentino, Louise Bolton, Weng, Monica,Aira Bermudez at marami pang iba. Isa-isang nasagip ni Joy ang mga dating kabataang pasayaw-sayaw lang pero ngayon umaarte na.