Sen. Grace Poe idiniin o inabsuwelto si PNoy!? (Bagito pero matikas)

MAY pananagutan si Pangulong Benigno Aquino III sa Mamasapano incident pero hindi siya maaaring parusahan dahil sa kanyang immunity bilang pangulo ng bansa.

Hindi rin naman umano siya puwedeng i-impeach dahil ang ‘pananagutan’ niya sa Mamasapano incident na ikinamatay ng 44 kagawad ng Philippine National Police – Special Action Force (PNP-SAF) ay hindi ka-impeach-impeach.

Ang isang klaro sa committee report ni Sen. Grace Poe, ang maepal na si suspendidong PNP chief, Dir. Gen. Alan Purisima ay naging isang malaking obstruction para sa kaligtasan ng SAF commandos na sinabing nagtagumpay naman nang mapatay umano ang aarestohing si Marwan.

Hindi nga raw puwedeng direktang makialam si Purisima kasi suspendido kaya bumagal ang pagpapahatid ng mensahe ng paghingi ng tulong sa PNP at sa AFP.

Dahil itinago rin sa kaalaman nina acting PNP chief, Gen. Leonardo Espina at Interior and Local Government Secretary Mar Roxas, lalo pang namatay ang daluyan ng command.

Kung hindi nga naman isinalang sa ops ang suspendidong PNP chief, dapat tumagos agad sa AFP at sa pulisya ang paghingi ng reinforcement ng SAF.

Ang siste nga ‘e parang may itinatagong kung ano si PNoy kaya kinailangan pa niyang ilipat-lipat ang command at hintay-hintayin ang komunikasyon mula kay dating PNP-SAF chief, Gen. Getulio Napeñas.

Mabuti na lamang at hindi nagpatumpik-tumpik si Sen. Grace Poe para ilahad ang resulta ng kanilang Senate investigation.

Ang tanong nga lang, makabubuti kaya kay PNoy at sa kanyang administrasyon ang inilabas na Senate Report?!

Abangan po natin sa mga susunod na araw.