3 sundalo patay 5 sugatan sa ambush

BUTUAN CITY – Nagpapatuloy ang hot pursuit operation ng militar sa Prosperidad, Agusan del Sur, para tugisin ang tumakas na hinihinalang mga miyembro ng New People’s Army (NPA) makaraan ang enkwentro na nagresulta sa pagkamatay ng tatlong sundalo.

Ayon sa impormasyon, sakay ang mga sundalo ng apat na military trucks nang sumabog ang isang improvised explosive device (IED) sa daan.

Agad binawian ng buhay sa insidente ang isa sa mga sundalo habang ang dalawa ay nadaganan ng truck.

Bukod sa mga binawian ng buhay, limang sundalo ang sugatan sa bakbakan.

Tumagal ng 30 minuto ang sagupaan ng mga tropa ng militar at hindi bababa sa 25 armadong NPA members.

Narekober ng mga awtoridad ang isang undetonated landmine sa lugar.