PAL balasubas ba talaga!?

KUNG maluwag sa loob ng ibang mga foreign airline company na magbayad ng kanilang utang na overtime (OT) pay sa mga empleyado ng tatlong ahensiya ng pamahalaan na naka-duty sa Ninoy Aquino International Airport (NAIA) at malaki ang naitutulong sa kanilang daily operations, ibahin ninyo ang Philippine Airlines (PAL).

E kakaiba talaga ang kabalasubasan ng PAL.

Ang PAL ang Flag Carrier ng ating bansa pero ang kompanyang ‘yan ang unang-unang naghain ng petisyon na itigil na ang pagbabayad ng OT pay sa Customs-NAIA, Immigration-NAIA at Bureau of Quarantine -NAIA.

For the record, ang sinisingil ng Customs-NAIA ay iyong utang pa ng PAL na overtime pay sa kanila bago pa pinatigil ng korte ang pagbabayad nito sa kanila noong 2010.

Ang daming palusot at delaying tactics na ginagawa ang PAL gaya ng pag-o-offer na gawing hulugan ang pagbabayad ng utang nila sa BOC-NAIA.

Kaya nga ang feeling ngayon ng government employees, lalong hindi matitikman ang bunga ng kanilang paghihirap kapag tuluyan nang nakabalik si El Kapitan.

Talaga yatang mas gusto nilang tawagin silang balasubas kaysa mapagkalingang airline company.

No wonder, kinakarma ang kompanyang ‘yan!