Deboto pa patay sa stampede

NADAGDAGAN pa ang bilang ng namatay sa isinagawang traslasyon ng Itim na Nazareno nitong Biyernes.

Dead on arrival sa Jose Reyes Memorial Medical Center ang pangalawang biktimang 18-anyos deboto na kinilalang si Christian Mel Lim ng 1926 Anakbayan St., Malate, Maynila.

Ayon kay SPO3 Glenzor A. Vallejo, ng MPD Homicide Section, puro gasgas at may marka ng mga tapak sa katawan ang biktima nang matagpuan habang nakahandusay sa kalsada dakong 4:07 kahapon ng madaling-araw makaraan maipasok sa Quiapo Church ang imahe ng Itim na Nazareno.

Sa tulong ng mga volunteer ng Philippine Red Cross na naka-istasyon sa lugar, dinala sa ospital ang biktima ngunit idineklarang dead on arrival.

“May mga bruises. May bakas ng mga tapak ng tao, nakamarka pa sa katawan. Kasi sa dami ng tao, siksikan pa dun, e, pag nawalan ka ng malay, napahiga ka, matutungtungan ka talaga, hindi ka na makababangon. Daig pa nun ang stampede,” paliwanag ni SPO3 Vallejo.

Ayon sa ama ng biktima na si Dennis Lim, ang kanyang anak ay limang taon nang namamanata tuwing Pista ng Black Nazarene.

Una rito, isinugod kamakalawa sa Manila Doctors Hospital ang negosyanteng si Renato Gurion, 44, nawalan ng malay nang atakehin sa puso.

Isinugod si Gurion sa Manila Doctors Hospital ngunit idineklarang dead on arrival.

Si Gurion ay miyembro ng Hijos Del Nazareno, ang grupong naatasang magbigay seguridad sa imahe ng Itim na Nazareno.

Ang labi ni Gurio  ay nakaburol sa kanilang tahanan sa Basilio St., Sampaloc, Maynila.

2 casualty sa traslasyon ikinalungkot ng Palasyo

IKINALUNGKOT ng Malacanang ang pagkamatay ng dalawang deboto sa prusisyon ng Itim na Nazareno na inabot ng madaling araw kahapon bago naibalik sa Quiapo Church.

Sinabi ni Deputy Presidential Spokesperson Abigail Valte, nauunawaan nila ang panata at debosyon ng mga relihiyoso ngunit sana maiwasan ang ganitong trahedya.

Ayon kay Valte, mahalaga ang pagkakaisa at unawaan ng bawat isang kasali para maiwasan ang ganitong sakuna.

“Oo, tama ‘yon. Actually, na-monitor natin na mayroon ngang isang nasawi kahapon, na ‘yung kabahagi siya ‘nung Hijos de Nazareno. Sayang, nakaka… Parang, ano ho, while we understand the nature of the religious event, we also want that people remain safe at nakikita naman po natin ‘yung mga ganitong pangyayari. But we believe that, if everybody does their share and everybody acts accordingly, maiiwasan po natin ‘yung mga malalaking sakuna at maiiwasan po natin ‘yung mga ganitong pangyayari,” ani Valte.

15 truck ng basura nahakot sa Traslasyon

NAKAHAKOT ang mga tauhan ng Metropolitan Manila Development Authrotiy (MMDA) ng 15 truck ng basura na iniwan ng mga debotong dumalo sa piyesta ng Black Nazarene kamakalawa.

Sinabi ni MMDA Chairman Francis Tolentino, tone-toneladang basura ang kanilang nahakot mula sa Quirino Grandstand hanggang sa harap ng Simbahan ng Quiapo makaraan ang traslasyon ng Itim na Nazareno.

Sumakit ang ulo ng mga tauhan ng MMDA sa pasaway at walang disiplinang mga deboto dahil sa kabila nang paglalagay nila ng mga basurahan ay hindi nagamit ang mga ito.

Jaja Garcia/Leonardo Basilio