Angel, busy sa pagpapagawa ng bahay

KAYA naman pala nananahimik ngayon si Angel Locsin ay dahil busy sa pagbabantay sa major renovation ng bahay niya sa eksklusibong subdibisyon sa Quezon City.

Kaya pala hindi napagkikita ang aktres ay dahil parati itong nasa bahay nila, ”hands-on kasi siya, gusto niya nakikita niya lahat,” ito ang tsika sa amin ng taong malapit sa aktres.

Wala naman daw sira ang nasabing bahay, ”may mga kailangang palitan kasi luma na, change of atmosphere, at saka for more functionality,” sabi pa sa amin.

Nabanggit namin sa taong malapit kay Angel kung bakit kailangan pa ng change of atmosphere, eh, hindi naman doon na tiyak titira ang aktres kapag ikinasal na sila ni Luis Manzano.

“He, he, he, sana roon pa rin or puwede namang palipat-lipat,” sagot sa amin.

Maraming taong nakatira pala sa malaking bahay ni Angel na akala namin ay ang daddy at ilang kasama sa bahay, doon na rin pala nakatira ang lahat ng kapatid ng aktres.

Maging ang mommy ni Angel na maski may sariling bahay ay dumadalaw din sa bahay ng aktres kaya masaya ang lahat ng anak.

Ulirang anak talaga si Angel dahil ipinaayos muna niya ang buong bahay na ipinatayo niya para sa magulang at mga kapatid bago niya ito lisanin kapag nag-asawa na siya.

As of now ay hindi pa nag-uumpisa ng shooting si Angel para sa pelikula nila ni Batangas Governor Vilma Santos-Recto pero tiniyak naman sa amin ng taga-ABS-CBN na anytime soon ay sisimulan na.

ni Reggee Bonoan