DAVAO CITY – Patay na nang matagpuan ang apat lalaking pawang nakagapos at maraming sugat sa katawan sa Brgy. Aneslagan, Nabunturan Compostela Valley Province.
Kinilala ng Comval-PNP ang mga biktimang sina Ramil Quilaton, Ruel Quilaton, isang alyas “Opaw” at alyas “Dongkoy.”
Ayon sa Comval PNP, magkahiway nang natagpuan kamakalawa ng umaga ang bangkay ng mga biktima sa loob ng limang ektaryang lupa.
Unang natagpuan sa taniman ng lemon ang walang buhay na si Ramil na nakatali ang buong katawan at puno ng saksak at taga habang makaraan libutin ng mga awtoridad ang nasabing lupa ay sumunod na natagpuan ang magkakahiwalay na tatlo pang kasamahan na nakagapos at puno rin ng saksak at taga ang katawan.
Dagdag ni Insp. Zoilo Molles ng Comval PNP, brutal ang pagkakapatay sa mga biktima dahil wala silang kalaban-laban. Iginapos sila saka pinagsasaksak at pinagtataga.
Dagdag ni Molles, away sa lupa ang isa sa tinitingnang anggulo sa krimen dahil ang ama ng mga biktima na si Melecio Quilaton ang tumutulong sa mga gastusin sa kaso ng nasabing lupa.
Inatasan ni Melecio ang mga anak na sakahin ang lupa para makabawi sa nagastos sa kaso.
Patuloy ang imbestigasyon ng mga awtoridad para makilala ang mga salarin upang masampahan ng kaso.