Thursday , September 20 2018
Breaking News
You are here: Home / Opinion / Sino ang sinungaling Rep. Toby Tiangco!?

Sino ang sinungaling Rep. Toby Tiangco!?

MAYROONG kumakalat na video sa social networking site, partikular sa Facebook.

Ito ‘yung video na guest speaker si Senator Antonio “Sonny” Trillanes IV sa inauguration noon ng SunChamp ni businessman Tony Tiu.

Nagtataka tayo kung sino ang nagpakalat nito sa mga social-site…hindi kaya ang kampo ni Rep. Toby Tiangco?

Anyway, malinaw sa nasabing video na “in good faith” si Senator Trillanes sa kanyang pakikipagtrato at pakikipag-ugnayan sa iba’t ibang tao at sa iba’t ibang sektor.

Sabi nga niya, noong panahon na pinaunlakan niya ang pagiging guest speaker sa inauguration ng SunChamp, inakala niyang isang mabuting negosyante si Mr. Tiu.

Ibig sabihin, naniwala siya noon na si Mr. Tiu ay isang negosyanteng hindi lamang sariling bulsa ang iintindihin kundi tutulong din sa pagpapaunlad ng ekonomiya ng bansa.

Pero ngayon nga na nasabit sa alingasngas kaugnay ng mga propriedad ni Vice President Jejomar Binay si Mr. Tiu, rason ba iyon para huwag gampanan ni Senator Trillanes na kwestiyonin ang ugnayan ng dalawa komo minsan ay naging guest speaker siya sa inauguration ng SunChamp?!

Mukhang mayroong maling lohika si Navotas Congressman Tiangco sa minsang naging simpleng ugnayan nina Senator Trillanes at Mr. Tiu.

Gusto ngayong baliktarin ni Congressman Tiangco ang sitwasyon dahil binibigyan ng malisya ang nasabing ugnayan.

Mukhang sanay na sanay kayo sa baliktaran, Mr. Congressman!?

Kamakailan nga lang ‘e, sinasabi ninyong nagkasundo na sina Pangulong Noynoy at VP Binay matapos ang ekslusibong pag-uusap sa Malacañang.

‘Yun pala ‘e, nakikiusap si VP Binay sa Pangulo na ipatigil ang ginagawang imbestigasyon ng Department of Justice (DoJ) at ng Senado.

What the fact!?

Sino ngayon ang mahilig ‘magbaluktot’ ng mga pangyayari?!

Huwag mong kalimutan Congressman Toby ang kasabihang: “Ang baluktot ay hindi maitutuwid ng isa pang baluktot.”

Pinakamaigi siguro ‘e huwag ka na lang magsalita muna kung napaka-illogical ng mamumutawi sa iyong bibig …

Piece of advice lang po Mr. Congressman, “less talk, less mistake.”

‘Yun lang ho!

Ano ba talaga LTFRB Chairman Atty. Winston Gines?!

ITO pa ang isang hindi pirmis ang mga inilalabas na patakaran — si Land Transportation Franchising and Regulatory Board (LTFRB) chairman, Atty. Winston Gines.

Ang sabi n’ya sa isang radio interview, ‘yung mga mayroong sariling negosyo ay hindi na kailangan kumuha ng prangkisa para sa kanilang delivery van.

Nagtakda sila ng deadline nitong nakaraang Setyembre (2014) kaya naman ‘yung iba ay nagkakandakumahog para mag-comply.

Nag-attend nang nag-attend sa mga hearing na itinakda ng LTFRB at nagpasa ng sandamakmak na rekesitos pero hanggang ngayon wala pa rin?!

NGANGA pa rin!

Ano ba ‘yan, LTFRB Chairman Gines!

Ipirmis ninyo nga ang mga patakaran ninyo!

By the way LTFRB Chairman Gines, magkano ba ang kinita ninyo ‘este’ ng ahensiya n’yo sa rationalization ng bus routes sa Luzon!?

Balitang-balita kasi na umabot ng P100 milyon daw ang kinita diyan?

Paki-explain

MIAA Coop Cell/Sim Cards counter binigyan ng ultimatum sa NAIA T-1

BINIGYAN ng ultimatum na hanggang nakaraang Lunes (October 20) na lamang ang mga taga-MIAA Cooperative para hakutin palabas ng Arrival lobby sa NAIA Terminal 1 ang kanilang wala pang isang pulgada at halos isang dangkal na lapad na counter ng Globe/Smart Cellphones loads/Sim Cards counter.

Ito ay sakaling hindi magkasundo ang MIAA management at MIAA Coop sa gusto ng una na magbayad ng upa sa gakulangot na puwesto.

Hinaing ng taga-Coop, gusto ng MIAA na magbayad sila ng 20% ng gross income nila every month bilang renta sa napakaliit na espasyo.

Sa panig ng Coop, bakit sila sisingilin ng ganoon samantala ang kanilang pinagsisikaping kitain ay pera naman ng mga empleyado na miyembro ng MIAA Coop  at hindi naman mga outsiders o masasabing others.

Binigyang-diin nila, na mukha umanong hindi na nagiging makatao at hindi na rin maka-Diyos ang mga patakaran na ipinatutupad ng kung sino man ang nagpapa-bright-bright na MIAA official na pati ang konting pakinabang ng mga empleyado na hindi naman galing sa masama ay pagtripan pa ng mga power trippers ng NAIA.

Oo nga naman. Wala na nga silang tinatanggap na benepisyo tuwing Pasko ay tatanggalan pa ng konting dibidendo.

How cruel naman!

Wala na ba kayong maisip na puwedeng pagkaperahan? Pati ba naman maliliit na manggagawa ng paliparan ay hindi pa ninyo mapagbigyan sa napakasimpleng bagay?

Doon na lang kayo sa advertisers o kay Simon Wong bumawi?!

Unfair labor practices ng Jolly-b Box Express Line Inc. (Attn: DOLE-NLRC)

Dear  Mr. Yap,

Sumulat po kami sa inyo sa paniwalang matutulungan ninyo kami sa dahilang kayo ay kasapi ng National Press Club of the Philippines (NPC) na may koneksyon sa mga diyaryo, radio at television.

Kami po ay pinagtatatanggal o napilitang mangagsipag-resign sa trabaho na mga regular employee na karamihan ay mga driver at pahinante ng Jolly-B Box Express Line, Inc., na may opisina sa Chattam House Building, Makati City. Ang negosyo ng aming kompanya ay import-export at door-to-door delivery o forwarding.

Kami ay mahigit limang (5) taon na sa trabaho subali’t nitong January 2014, pinapirma kami sa bagong kontrata kung saan lumalabas na hindi na kami itinuturing na mga regular employee na tumatanggap ng aming dating daily wage o salary kung hindi mga contractual employee na lamang na sixty pesos (P60.00) – forty pesos (P40) per piece rate na ang matatanggap na “sweldo.”

Ibig sabihin, bilang mga driver at pahinante, kailangan namin makapagsakay o makapagkarga sa aming six (6) wheeler cargo truck with closed container nang ‘di bababa sa sampung (10) boxes ng mga kargamento bawa’t biyahe upang mabayaran kami na mga driver ng halagang P60.00 bawa’t box at P40.00 naman bawa’t box para sa pahinante. Kapag nangyari na mas mababa sa quota  na 10 boxes  ang maisakay o maikarga namin, forty pesos (P40.00) – thrity pesos (P30.00) na ang magiging bayaran; P40.00 para sa driver at P30.00 sa pahinante.

Bukod sa pagod na ang driver sa pagbubuhat at pagsasakay ng mga kargamento bago pa bumiyahe, obligado kami na maihatid nang ligtas sa tamang oras sa destinasyon ang nasabing mga bagahe kahit abutin pa kami ng hanggang apat (4) na araw sa paged-deliver, ang P60-P40 o P40-P30 per piece rate na ang basehan ng matatanggap naming “sweldo” mula sa kompanya at hindi na tulad ng dati na arawan ang kwentada ng aming sahod.

Para sa inyo pong kaalaman, wala rin kaming natatanggap na overtime pay mula sa kompanya kahit pa mahigit walong (8) oras ang aming pagtatrabaho o kahit pa pumapasok kami ng holiday o pista opisyal.

Hindi rin kami binabayaran ng kompanya ng night differential pay kahit pa abutin kami ng magdamag at kung ilang gabi sa pagbibiyahe namin at wala rin kaming hazard pay. Bagama’t may one hundred twenty pesos (P120.00) naman na meal allowance na ibinibigay sa amin ang kompanya, ni minsan ay hindi kami binigyan ng allowance para sa “lodging” kapag bumibiyahe kami ng kung ilang araw at gabi sa malalayong probinsya kung kaya kadalasan at karaniwan na sa sasakyan namin o sa parke o plaza na lamang kami natutulog, dumudumi at naliligo.

Ito na po ang bagong “sistema” na ipinapatupad ngayon sa aming kompanya nina vice president Helen Benitez, Operations Manager Amelia Madrid at Accounting and Administration Officer Amie Gumilet.

Batid naming malaking paglabag sa batas-paggawa ang ginagawang ito nina Benitez, Madrid at Gumilet subali’t wala po kaming magawa.

Sana po, mapagkalooban ninyo kami ng abogado at mailathala rin ninyo ang kalunus-lunos na kalagayan namin ito.

Tulungan po ninyo kami!

Umaasa sa inyong agarang pagtulong at gumagalang,

(Pakiusap po namin na pansamantala, huwag ninyo na muna sanang banggitin ang aming mga pangalan sa inyong kolum sa diyaryo. Salamat po!)

Sa management ng Jolly-B Box Express Line Inc., bukas po ang aming kolum sa inyong paliwanag sa isyung ito!

 

Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected] Para sa mga nakaraang isyu ng BULABUGIN please visit http://www.hatawtabloid.com

Jerry Yap

 

COMMENTS

About hataw tabloid

Scroll To Top
 

Copyright hatawtabloid.com | All Rights Reserved