Isabel Granada, kayang pagsabayin ang singing at acting!

KADARATING lang ni Isabel Granada mula Bahrain bilang bahagi ng concert ni David Pomeranz at tuwang-tuwa ang tisay na singer/actress dahil kahit malaki ang venue ay napuno nila ito.

“I think si David and some Filipinos have seen me sing Got To Believe. So, parang nagkaroon siya ng idea na isama rin ako sa show na ginanap sa Bahrain International Circuit Ground, which is a big venue. Six thousand ang capacity nito, at punong-puno siya. Kaya thank you sa lahat ng mga kabahayan nating nanood at sa locals doon,” panimulang kuwento ni Issa.

Nabanggit din ni Isabel na sunod-sunod ang kanyang singing engagements ngayon sa abroad at natutuwa siya dahil may time ulit para sa kanyang singing career. “May show ako sa Japan at may cruise akong gagawin. Tapos sa December ay sa Philippine Fiesta sa Australia. Sa February na yung show ko sa Europe, na-move siya.

“Nagkataon lang po ito, like I did a couple of shows sa Australia last August. Kapag ganoon pala, ‘pag nag-show ka sa Australia at nalaman ng ibang groups, gusto rin nila na mag-show ka sa kanila dahil malaki ang Australia e. So hopefully ay magtuloy-tuloy.”

Bukod sa singing, may time rin ngayon sa acting ang unica hija ni Mommy Guapa. Naibalita nga ni Issa na matapos niyang maging bahagi ng ABS CBN TV series na Got To Believe nina Daniel Padilla at Kathryn Bernardo, papasok din siya sa Hawak Kamay ni Piolo Pascual.

“Hawak Kamay has already called me, nagkataon lang na I was abroad. So, they’re calling me back.”

Idinagdag pa ni Issa na masaya siyang mabigyan ng chance na makapagtrabaho sa Kapamilya Network. “It’s a privileged, it’s an honor na makatrabaho ang mga tulad nina Kathryn and Daniel. Kasi, napakabait ng mga batang ito kaya hindi nakapagtatakang kinakikiligan sila talaga ng fans.”

Nagpapasalamat din si Isabel dahil sa pagdating ng maraming endorsements sa kanya. “Yes, nagpapasalamat po ako unang-una sa Haima cars, ‘It’s My Car’ ang tag line namin diyan. Then, sa Vital-C, Avail Philippines, FC Bio Sanitary Pads, Saver’s Home Depot, Cerd’s California Beau, Dream A, at iba pa.”

ni Nonie V. Nicasio