Kelot isinemento sa plastic drum

MASANGSANG na ang amoy ng bangkay ng hindi nakikilalang lalaki na isinilid at isinemento sa plastic drum nang matagpuan sa Novaliches, Quezon City kahapon ng madaling araw.

Inaalam ng Quezon City Police District (QCPD) ang pagkakakilanlan sa biktima na nasa edad 30 hanggang 35, katamtaman ang pangangatawan, kayumanggi, nakasuot ng blue t-shirt, black jacket at shorts, may tattoo na Noah, Banjo 128. Tadtad ng saksak sa iba’t ibang parte ng katawan ang bangkay.

Dakong 3:35 a.m. nang matagpuan ang bangkay sa panulukan ng Santiago Avenue at Ciriaco St., barangay Sta Monica.

Nagpapatrolya ang mga tanod ng Sta. Monica, na sina Joselito Guerrero at Jonathan Pelo, nang mapansin ang isang plastic drum na pinagmumulan ng masangsang na amoy.

Nang usisain ang drum, tumambad ang paa ng tao na nakabaldosa kaya agad inireport sa pulis. Sa pagsusuri ng Scene of the Crime Operatives (SOCO), tadtad ng saksak sa iba’t ibang bahagi ng katawan ang biktima.

(ALMAR DANGUILAN)